vendredi 19 septembre 2008

مغامرات تيتوف الوردية

في رحلة البحث المعقدة و المستمرة عن تيتوفا من عادة تيتوف انو كل مايلتقي بفتاة في جلسة حوار او عمل انو يطلق على اللقاء اسم و الاسم يختارو من المعجم العسكري على غرار عملية عناقيد الغضب او ثعلب الصحراء و غيرو في انتظار انو يلقى تيتوفا الاصلية
على خاطر حاليا منتصورش كان تيتوف باش يحقق انجازات او مكاسب على الجبهة بسبب ظروف يطول شرحها و مهوش لا المكان لا وقت المناسب باش نخوض فيها يكفي انكم تحطو في الحساب عامل الحديد و ارتفاع اجور اليد العاملة في حضاير المرمة
المهم المرة هاذي تيتوف حضر روحو لعملية جديدة و اخترلها اسم محلي عملية الوعد الصادق نسبة للعملية متع اللوخيان في جنوب لبنان لانو وكما يبدو الطفلة مختلفة برشة عالمنتوج المحلي الخام متع لا لتسريب الرمال و عاري اكثر انفتح اكثر
و بالفعل بدى تيتوف يعد في العدة من رباط الخيل و الكلمات المنمقة و التكتيكات المبتكرة لانو وبساطة تيتوف يكره الكلاسيكيات في تعامل مع الجنس الاخر و يرفض انو يستعير من المعجم الوطني التبزنيسي المبتذل
ومنساش انو يتعدى عالتليفون و يقوم بتغير بعض الاسماء على غرار سلمى الي تحولت الى عبد السلام من غير جراحة و انما بقدرة تيتوفية ههههههه
و بالفعل تمت عمليات ما قبل اللقاء بشفافية عالية وبتركيز و تمعن كبير لانو ملازم شي يقعد لصدفة و اذا فشل البلون ا يتم بصفة اتوماتيكية الالتجاء الى البلون ب و اذا فشل ا ايضا نتعداو للمبعدو وهكذا دواليك لين نتعداو عالابجدية الكل
و الموعد كان يوم الاحد بطلب مني لاني بساطة نتشائم منو السبت و نعتبرو نهار نحس بالظبط
لكن يبدو انو تيتوف معملش حساب لعامل الظروف متع الهدف أي الانسة و الي اتصلت بيه في وقت متأخر من ليل باش تعلمو انها مغادرة نهارت الاحد مع العايلة باش يحضرو سابع متع ولد خالتها و بالطبيعة حكاية كيما هكة تيتوف ميعمللهاش حساب و لانو وبساطة في بالي كيما الناس الكل السابع في شهر نوفمبر و مزلنا بعاد و بذلك طلبت الانسة انو الموعد نقدموه ليوم السبت وهكة تيتوف ملقاش قدامو خيارات برشة الا انو يذعن للقدر متاعو ويكون من اصحاب السبت
و اختار انو يغير اسم العملية من عملية الوعد الصادق الى عملية امطار الصيف و بما انو كل عملية عندها خصايصها و و استراتجياتها فانو عملية امطار الصيف تختلف برشة عن عملية الوعد الصادق الي تركز على الحوار و المركزية على عكس عملية امطار الصيف الي تركز على عامل المكان و الهجمات المرتدة و اللعب المفتوح و بذلك كان عامل الأرض او لوية في حسابات تيتوف و الي مقاش مشكلة في تحديدو لانو بنزرت الى جانب انها تمتاز بالزبلة في كل بلاصة و الريادة في تصنيف أقذر مدن قز درية في العالم رغم المجهودات الكبيرة الي تقوم بيها البلدية و الي مكنتها من حصد عدة جوائز في النظافة و العناية بالبيئة مشكورين لوخيان ربي معاهم عادا قلنا الى جانب هاذي القذارة تتميز بنزرت بوفرة الاماكن الرومنسية المطلة على البحر رغم انو البحر تظلي الريحة تلعلع بالمحروقات البشرية الي تصب فيه اما اش باش نعملو شد خشمك بمقراص و اقعد و على هذاكة عملية امطار الصيف خذات بعين الاعتبار العامل القاسي هذا و بذلك مركزتش في الاستراتيجية متاعها على الحوار بقدر مركزت على المكان نفسو نسمة وبحر و غيرو من الاجواء الرومنسية
هيا تعاداو الايام و جاء اليوم الموعود و بما انو الطفلة متحصلة على الاستاذية في الاقتصاد كان على واجب على تيتوف يظهر الجدية متاعو يبعد كل البعد عن الملابس الرياضية الي تحمل ايحاءات ايدولوجية او غيرو و اختار السورية و السروال قمارية رغم انو كان يحس بعدم الارتياح و ذلك بسبب كرهو التاريخي و الجغرافي للبزاة و اصحابها للانو بصراحة مهردو العالم كان التصاور هذوكم
و كذلك كان على تيتوف انو يتلز الى استعمال العطور الامريكية وكان مع كل طشة يشعر انو يطش في الدم الفلسطيني على روحو و مع كل استنشاق كان يستحضر في رائحة احتراق بغداد
على كل منتطولش عليكم
غادر تيتوف الدار و انطلق نحو الجبهة و كلو تطلعات بريادة و تحقيق مكاسب و انجازات تمكنو انو يتفاخر بيها و ترقى بيه لمصب القائمين و المنظرين لمثل الانواع هاذي متع العمليات
هيا وصل سي تيتوف للمكان المحدد و تعمد انو يتأخر عن الموعد لانو من خصايص عملية امطار الصيف تعمد التأخير و بالمناسبة هاذي عملية امطار الصيف عملية عسكرية قامت بيها قوات الاحتلال في مدينة غزة الصامدة و كان من ميمزات العملية كونو كانت رد متأخر على عملية اسر جلعاد الي عملوها لوخيان في حماس و الي جرت هالجربوع الي مجى شي لا من الشكل متاعو ولا من الرتبة و المضمون ماتو برشة ناس و دمرت مدينة كاملة و العملية هاذي مدامنا في باب العمليات تختلف برشة على عملية الثعلب الصحراء الي تقتضي التبكير في القدوم و الانبطاحية في الاداء و سياسة اللف حول الهدف و تحين الفرصة المناسبة للانقضاض
على كل و صلت للمكان الي كان يمثل مقهى مختلط في الميناء القديم او القصيبة كما يحلو للبعض تسميتها و ماكدت ندخل حتى ريت يد تشاورلي تلفت خلفي للانو منكذبش عليكم الانسة الي شاورت ممكن اول مرة نراها قلت بلكش وحدة خاطية تشاور على واحد اخر ورايا و لكن الانسة ابتسمت وقتلي
تي شبيك تيتو ههههههههههههه
ايواه بديناها بالتهنتيل و باش نقللها معقلتكش موش معقول نتيجة غير محسوبة
تيتوف يجبد كرسي
_السلام عليكم ...شحوالك عواطف
_لباس هههههههههه لباس هههههههههه شبيك يا خي معرفتنيش ههههههه
تيتوف بينو وبين نفسو
ايواه وقيل الطفلة قارية كتب متع عمليات و قاعدة تمارس في عملية الوعد الصادق الي قايمة كيما قلت عالمركزية دونك لازم الانتقال الى المخطط ب و عملية الشتاء الساخن الي تنجم تاقف في و جه العملية هاذي
تيتوف _لا عواطف ..جيست تلفت
عواطف _ههههههههه هيا باهي
منعرفش علاش المرة هاذي كانت مغايرة عل المرات الي التقينا فيها لقاءات عابرة و سريعة
على خطرني نعرف شعرها اكحل نلقاه بلون لتو مفهمتو بالرغم انو اختصاص عملي في الالوان
و عمبالي عينيها شهل نلقهم زرق الحاصل حتى باش تقول كلمة غزل توحل للانو هاو مثمة شي من الدار كولو مركب ميجيش تو صف شعر الناس و الى عيون مزيفة
تيتوف _هالشانطي الي حالتو في روحك يا بنتي يا خي في بالك ماشين باش نكتبو الصداق و الا تموه في القوادة و الصبابة
عواطف تبعد شعرها بيدها على كتفها في حركة مفاجئة يحفظها تيتوف و تخليه يبتسم ابتسامة سا خرة من الحركةالكلاسيكية هاذي
عواطف_ههههه عجبك اللوك الجديد
تيتوف يهز حواجبو في استغراب
_لا موش حكاية عجبني و الا معجبنيش انا نحبك تكون كيما انتي على خاطر في لخر الي باش يهمني بدرجة اولى هو الطاسة الي تحوص بيها شفيها
عواطف شنية الطاسة ؟؟؟؟؟؟؟؟؟؟؟؟؟؟؟؟
تيتوف _ مخك
عواطف بضحكة
ههههههههههههه مابلدك يا تيتوف
هيا احنا هكاكة و يقتحم علينا القعدة بياع الفل
بياع الفل
_ السلام مسيو تخوش مشموم فل
تيتوف_و عليكم السلام لا مستبرد خويا
بياع الفل و يبدو انو مصر و الحمد لله انو من ضمن استراتيجية عملية الشتاء الساخن طريقة لتصدي للاشكال هاذي
بياع الفل با هي شوف الانسة تخوش
تيتوف _ معندهاش صرف خويا
بياع الفل ميسالش نصرفولها قداش عندها
تيتوف ببرودة دم عندها 100فرنك
بياع الفل يوخر في اشمئزاز لتالي و ينطق و يتمتم بكلمتين مكبتيت منهم كان حرفي ال"ز"و ال"راء"الي يكونو متواجدين في كل شهادة شكر يقدمها التونسي لخوه التونسي على اثر فعل تكريزي او تهنتيلة
عواطف تتطرقش بالضحك
الزح قداكش بليد يا تيتو
تيتوف _ميسالش ماو طعيتلي محمد
عواطف لواه
تيتوف يذبل عينيه و يحاول انو يفسكي لقطة من فيلم الوسادة الخالية متع شادية و عبد الحليم و قت عبد الحليم قال لشادية نفسي اسمع الزاي بيطلع اسمي مابين شفيفك الحلوين و بالفعل تم اختيار اللقطة و تمريرها الى برنامج الترجمة من اللهجة المصرية الى اللهجة التونسية
تيتوف يعطيها حقها
_ لا نحب نسمع اسمي كي تنطق بيه وحدة في زينك شهوة عازب يا رسول الله و الا كان انتم الصبايا تشتهاو قالو شهوة بنت بكر
عواطف _هههههههههههه با هي تيت.........محمد
تيتوف يدعي انو اطرب
_يااااااااااااا محلاه اسمي خارج من فمك
_عواطف لا محمد هذاكة اسمك حلو
تيتوف
_ يعيشك (وبينو وبين روحو كان حبيت حتى هذاكة اسم الرسول و الا ناويا تهدرلنا دمنا )
عواطف(وملامح الجدية علا وجها ) قلي تيتوف ياخي موش في بالي بيك خاطب
تيتوف يتفاجىء و يتراجع الى الخلف
_ أي و انتي منين ليك و الا شكون المأفون الي قالك
أي نعم يا للا كنت خاطب بنت عمي تعيش في الخارج و بطلت
_ولواه
_تيتوف بنبرة ساخرة
_خفت لولادي يطلعو معاقين ههههههه اما هاو باش نحكيلك شوف يا للا(..................................................)

على كل يا جماعة منتطولش عليكم للانو ثمة حاجات متخصنا كان احنا الزوز (مهاش الحجات الي في مخاخكم هههههه
المهم حكينا في كل شي و حتى شي و مبدئيا الانطباع عليها طيب طفلة مثقفة و متربية و بنت عايلة و تمكنت من المرور من الدور الاول في بطولة لقب تيتوفا

10 commentaires:

WALLADA a dit…

يا تيتوف يهديك ، يجعل منّك راهو رمضان خلّي الرّنديفوات للفطار هههههههه
أيا ربّي يوفّقك

kacem a dit…

نص جميل جدا

على عشرة نعطيك 7.5 /10

titof a dit…

يا ولادة هاو احل اليكم ليلة الصيام .......
شكرا قاسم

black dark a dit…

شنوة تيتوف, بدات لعجلة تدور ولا تجس في النبض وبرا .... (-: على كل, ربي يهديك, حيرت المواجع في الشهر الفضيل. أما ما تغمناش في بقية الحكاية عاد ;-)...

فراشة a dit…

malla titof :P

هناء a dit…

نشوف بلي تيتوف نزع ثوب المقاومة و لبس ثوب العاشق الولهان

بصحة خويا

titof a dit…

يا هناء قعدت كان انا فيكم منيش عاشق هههههههه

Scodento a dit…

هههههههههههه

وحدك يا طفل
ماذا بينا تكثرلنا من المقالات ذات الطابع الاستراتيجي هذي خلي نتعلمو من عندك

حظ سعيد و ربي معانا غدوة كونتر الحرس
(:

sonyawar a dit…

حلو برشا البلوق متاعك
سنية ترر فرر

sonyawar a dit…

حلو البلوق متاعك
سنية ترر فرر