mercredi 29 avril 2009

حالة في هالبلاد

هيا ياجماعة شحوالكم عملت طلة قبل التدوينة هاذي على شانطي تونزي بلوغ بعد فترة من الغياب و عودة قصرية الى احضان عاصمة الجلاء و اكبر منتجع سياحي متع عسكر والاخضر بطبيعتو وكمل معاهم بزاتهم الخضراء ا ...اصلا لين الواحد ينسى الي هو يحوص في بنزرت ويمشي عمبالو الي هو في رحاب ليبيا تلمون لخضار عاطي مسد
عاد قلت مدامني ليوم راجع لرحاب الساحل الشرقي فيما باس نعمل تدوينة و نهر شوية ونحكي عالعودة القصرية لوكري
عاد وخيكم قاعد في امان الله وسط حضبة متع رفاق من روسيا الشقيقة نتبادلو في الثقافات و غاطسين في جملة من المباحثات و نحس كان الضو ضربني في ضرستي كنت قاعد نلقى روحي واقف هاي قلت موش مشكل ضرسة تعمل في المشاكل تو واحد ينزل عليها بداودي و الا يمشي لجماعة المنتوننس يكري واحد فيهم بزوز سوقار تو يقلعاهلو عندهم زنس كلاب يفر في الحديد
هيا في ليل طلعت نتأنق و نحط في الحطة حليت فمي نلقى فيه نفخة عالمية الحاصل تفجعت و قلت خلات و جبتها وجيتها و مهبطتش نخدم
في الصباح قابلت شاف جردة تعديت صبحت عليه و ديما نمشي الحق سيد بهت مالف كل صباح نعطيه باكوه و نبر عليه لين حلف باش يحشي فيا فركة
في هاو ماتصلح كان للحضاير ..جردة رديتهالنا جردة بلدية ...نوارك مضروب و القازون جيب البقر تسرح فيه و اك اللوغة
عاد عيطلي السيد
*شبيك تيتو اليوم
*بربي اخطاني يا شاف فمي منفوخ ومنيش ناقصك
*ياحباني ...ياحباني اي مشيتش لطبيب
*لا ...تعرفش انتي طبيب باهي
*اي نعرف ..تو نهزك ل...ب5الاف برك
*بجدك
*و الله يديه تجمد الما معروف برشة تو نكمل و نهزك
*مكش ناوي تولي انسان انا عندي انفكسيون و لا درا اش منسخطة و النتي تقلي عراف ....زايد و الله زايد متصلح كان متع حضاير حرام فيك الجردة
*تي علاه يا تيتو الكلام المرزي انا ريدلك الخير و الله اك المرة ....نقص عليه الحديث و نخليه و نمشي
ناخو اذن من عند عرفي و نهبط لسوسة دلو ني على جراح غادي امورو هانية
ندخل لسيد
*السلام
*السلام ولدي تفضل
*عندي حالة انتفاخ دكتور منيش عارف منين
*حل نطل
*هات دنوس
*نعم ولدي ؟؟؟لباس ماو
*لا لباس شوف طل
*يا حباني يا حباني تي هاي شادة بعضها الداخل ...سكر سكر
*شنوة دكتور نعيطو لبوب
*يا ولدي شبيك ههههه
*اسمع ولدي هات30 دينار و تو نحكيو
مديتهملو وانا نادم الي مسمعتش كلام شاف الجردة ونحوص بعنيا في الكابيني الي تقولش مورق متع موتا في الحرب العالمية لولة تصاور متع اك الوزوازة و افام منشرة متع بشر الله اعلم منين طاح بيهم الحاصل ديكور متع فيلم رعب اك الي يهزلك المورال و يشيخك في مخك
ولدي منجم نعمل شي حتى تتصور و تعمل تحليل دم الشي قريب للمخ و يخوف
وانا وينك وجه ولا ازرق و اصفر و اخضر
*دكتور باش تبعثني لصالح عزيز
*لا يا ولدي صلي عالنبي باش نبعثك لفرحات حشاد
منعرفش علاش في ا اللحظة هاكي ضربتني الكراهية للمناضلين متاعنا و اساميهم
*اعمل تصويرة و هاو دوا خوذو
*اي قش يتكلفو دكتو
100دينار
*اي راسي باهي دكتور منجموش نقلوعها و اخطانا من الجري و فرحات حشاد و كان عالكلاب نجيبو انا
*لواه معندكش فلوس
تي 30لخرة هاك خذيتها و فوقي كان 10الاف
*منين ولدي انتي
*بنزرت دكتور
*واش مجيبك لهنا
*يعجبكش..باهي دكتور باهي
نهز التليفون نكلم الدار باش بيعثولي فلوس
*الدكتور....غريبة بطولك بحبولك و الدار يبعثولك
*شمقلق سماك انتي بلكش تصرف على جبد بابا و الا عندك معايا ورثة ....يا بالحرام لاني منفعك اقعد نش الذبان
نخليه ونمشي نتعدى للبوسطة باش نجبد فلوس باش نروح
نقص نومرو 190و نسمع الصوت يعيط 121شباك4

dimanche 12 avril 2009

ابتسم انها تونس

هيا اسيدي قالك ثمة وحيد من العصور الغابرة موش تونس و بعيد علينا و على حكايتنا توفى بعيد عليكم الشر و هذا يزيد يأكدلي كلامي الي لحكاية مهاش في تونس على خاطر احنا في بلد الفرح الدائم متمتوش هكاكة فجأة لا طاح لادزوه طلق الاربعة و بلع سبركة و انما ثمة مجموعة من الاسباب الي تخليك تموت و هذا ان دل على شيء يدل على قدرتنا كشعب منظم بون ممكن ثمة حالات شاذة يموتو فجأة و في ظروف غامضة و الا حتى يختفيو في مستشفيات المجانين و الغالب تلقاهم من الجماعة الي تحكي برشة و معجبها شي و نهار كامل تعمل في الداوانة عادا قتلك احنا منمتوش هكاكة على خاطر تلمون مراقبين و منظمين لازمك تعلم قبل ما تتطلق الاربعة و تعمل مجموعة من الاجرءات البلدية لدى الجهات المختصة من تعريف بالامضى و تبرير سبب الوفات يعني علاش باش تتوفى و بالمناسبة هاذي نحب نحذر لوخيان الي باش يصدمو عالوفاة انهم باخذو حذرهم في البحث متاعهم و يقولو انو سبب الوفاة كنتيجة لفقعان المرارة من العوج و الهم الي يشوفو فيه على خاطر الحكاية هاذي مخطرة و متخليكش تتحصل على تصريح بالوفاة و تقعد هكاكة معلق و ربما يكروشيولك كرومتك بتل بوسة حتى روح مطلعش و لين تتوضح امورك
عادا ثمة اخ بلع زروصو من غير ترخيص و هزو دفنوه اماليه في حفرة بالسرقة في قلب اليليالي و كان موش حشمة رام طيشوه في الواد
حتى الاخ المفقوع المرارة في بالو سلكها هو مزال يجبد في النفس و يجيوه الجموع منكر و نكير بون قعدو موش على شقف على خاطر الفوق كلنا نعرفوا كل نفس بما كسبت رهينة يعني الظلم باب و تسكر
عاد قعدوه ههههه وبدا التحقيق
من ربك
السيد بلع لسانو و يهفو عليه يهبطوه لسابع ارض هههه ثماش فيكم شكون يعرف سابع ارض وين موجودة
المهم عاودو جبدوه و طرحو نفس السؤال بنفس الطريقة
السيد ذكرلهم اسم رئيس غانا يعاودولو بكعبة اخرى لين تفرك
المرة ثالثة عاودو سئلوه قاللهم الله قاللو اي و كي انتي تعرف لواه تشيح الريق اجابهم بعفوية كيما عفوية كل مواطن بعد داودي ياكلو بلاسبب من عند عون امن
نسخايلكم امن الدولة