jeudi 31 décembre 2009

رحم الله وطني

لارغبة لي في افراغ منفضة السجائر رغم امتلائها الى حد الفيضان و ترتيب اشياء غرفتي المبعثرة منذ ايام

لارغبة لي في مراقصة قهوة الصباح و الابحار بين بعض الكلمات

فقط تهزني رغبة جامحة لتدخين سيجارة

اقسم بعد احتراقها ان تكون الاخيرة لكني ككل مرة احنث بقسمي و اشعل اخرى منتظرا في صمت احتراقها

لاقسم ثانية انها الاخيرة

تبدو الامور عبثية بعض الشيء و حالة الاختناق المفتعلة التي تسود البلاد منذ سنوات تحمل شعارا واحدا شعار المرحلة الراهنة "استهلك وسكر فمك"وسط هذا الكم الهائل من الاحباطات و المغالطات و المحرمات

فممنوع عليك ان تتحدث عن النظام او تلقي النظر حتى خلسة من تحت البساط الى الحديقة الخلفية للقصر

فالامر اصطبغ بالمقدس و اخذت الاشكال مضمونا لايمكن ان تتحمله و صار القائد اقدس من رسول ارسله الله رحمة للعالمين

من ذلك ان المواقع التي تثرثر بلا رادع عن نبي الرحمة و التي اختصت هذه الايام في شتمه و النيل منه تتجول في امن و حرية بعيدا عن مقص الرقيب

فالمخبرون لايهمم ان نبش احد في معتقد الاغلبية و كال الطعنات المدروسة القذرة الى رموزه

ومن هنا استحضر تلك الصور الكاريكاتورية عن نبي الرحمة التي و الي اليوم لم يمتد اليها مقص الرقيب

واقارنها بالمواقع التي حجبت و التي نالت من شخص القائد

الامر يبدو مثيرا لضحك عندما تحمل الاشياء اكثر من مضمونها وتصبح حالة الاختناق المفتعلة خبزا يوميا نغمسه بجراحنا و نستهلكه مكرهين

اليس شعار المرحلة اليوم "استهلك وسكر فمك"الم يكن بالامس"تضربولي عالطيارة"لكن قله هم من يدركون صعوبة الموقف و الهاوية التي نسير اليها مكرهين نتيجة خوف يسكن كلماتنا فتخرج الينا مرتعشة شاحبة خاوية من أي مضمون يستطيع رسم صورة عن فكرة واضحة

ربما لم يكفيهم الحجب و التحقيق حتى ارسلو الينا بطلا من ورق يصارع طواحين الهوى و ينتشي بمكاسب لاندري من اين جاءت

ربما كان يقصد مراكب الموت التي ابحرت تحت جنح الظلام يحملها ياس الشباب نحو غد افضل وانتهت الى قاع البحر و انتهى اصحابها طعاما للحيتان

او ربما عن طلاب الجامعات الذين يقبعون في نسيان داخل صقيع الاسفلت و يضاجعون السجون و الظلام

او ربما يتحدث عن حمالات الرافل و الاعتقالات العشوائية التي تذكرني بالحروب الصليبية في بيت المقدس قبل قرون وكلامهما متشابه و هدفه النيل من الكرامة

او ربما يتحدث عن الاعلام ودوره في نشرة الوعي في صفوف المجتمع المنخور الذي يسكنه الخوف و الكبت

بربكم مالكم كيف تفكرون ا بعبارات "كرمز اللذة الجنسية"والتخوين ينشر الوعي

ا بتحريض على القتل و استعمال مفردات الخشب يغرس الوعي ....ولئن سألتهم لاجبوك بصوت غوغائي واحد "استهلك وسكر فمك"

هذا ان لم تجد صورتك تتصدر احدى صحف البلاد تحت عنوان

الشرذمة الناعقة و المتمسحون

الويل لك اذا ان أنت فكرت يوما ولو بوحا في ان تخرج عن القطيع وتكسر عصى الراعي

كم هي مملة ايامنا بين الواقع و المنشود ...بن الرغبة و الحرام ...بن الوطن و الضياع

mercredi 30 décembre 2009

المملكة السعيدة الجزء الخامس

برشة قراء للاجزاء السابقة وخاصة منهم العنصر النسائي تساءلوا عن غياب الدور الانثوي في المملكة وتسألوا خاصة عن السلطانة

والواضح انو من وراء التساؤلات ثمة نية مبيتا لتصوير صاحب القصة على انو من جماعة السكسيزم و المناهضين للمراة ودورها الفاعل في المجتمع

أي نعم دورها الفاعل كيما اثبتلنا سي طاهر الحداد انو المرى تنجم تكون عندها استعملات اخرى بخلاف التطيب و الواجبات الزوجية

على كل موش هذا موضوعنا

حبيت نقللكم الي سلطانة موجودة وراكشة في القصر الاانو المملكة وعرشها والي صاير فيها مكانش يهمها

الحاجة الوحيدة الي كانت تهمها انو كفاش تحافظ على جمالها وشبابها ونضارة بشرتها رغم تقدم السن و الي منفع معاها لادوف لا امو نظيف ولا حتى تايد للغسيل وخاصة انو السلطانة كانت جميلة برشة كيما الي قال فيها الشعر

قل لتحفونة في قصر السلطان ...كيف تنام على مقليتك الاشجان

امن خير المملكة وماكلة البنان...نضر جيدك واستوىحسنك الفتان

عادا قلنا انو السلطانة كانت تحمل الهاجس متع تقدم السن الي باش يرزيها في جمالها الشي الي خلاها دور وتكسر المرايا متع القصر الكل وتمنع وجودها في القصر على خاطر المرايا كانت تقول الحقيقة والسلطانة مكنتش تعجبها الحقيقة هاذي كيما برشة حقايق اخرين

المهم انو السلطانة نهار حالة جريدة بودرو من الجرايد متع المملكة تلقى اعلان متع مشعوذة عندها سر الكونسار و السيدا والجمال الي ميوفاش وفتكم بالحديث انو في المملكة السعيدة كان ظاهرة التشعويذ منتشرة بكثرة اضافة انها كانت لاقية دعم كبير من صحافة المملكة الي رغم انها تدعي وتفتخر بالمكاسب العلمية الي حقتتها الا انو الممارسات هاذي لاقية صدى كبير سواءا في البلاط الملكي اوفي الوسط الشعبي

وثمة اشعة في المملكة و الله اعلم خاطر انا مريتش بعيني انو ضمن المستشارين متع سلطان كان ثمة مشعوذ يعمل عليه الملك برشة في قراة الطالع و التداوي بالحشايش وتسير بعض امور المملكة

الى جانب هذا كانو المشعوذين متع المملكة و السحرة عندهم صيت كبير و بعض النفوذ الشي هذا خلى الطبة متع المملكة ينقلب اكثرها لعرافين ويبدل الكابينة متاعو من طبيب مختص الى مشعوذ عام

خاطر حسب الطبة هاذم زايد انك تقرى و تمشي للمالك اخرى وتقطع روحك لتحصيل العلم ومن بعد يشي عراف قاري درج مكتب وحافظ ايتين يسمسر بيهم وزوز اساطير متع الاولين ويجي يخليه ينش في الذبان

عادا قلنا انو الملكة حفظها الله اتصلت بمشعوذة الجمال تانيت الي نصحتها انها طوف عالمقابر و تهز معاها مقص حجامة وتقص شعورات الاموات الفرشك وتغليهم مع طرف نعناع وتزيد عيلهم دوزة جودة الحياة وتشربهم قبل فطور الصباح و بحول الله تقعد ديما ترنكوشة و امورها واضحة

على هذاكة الملكة وقت ماتو الحراقة كانت فرحانة برشة بالصابة متع الشعورات الي جاتها مع تاكيد البعض انهم راوها قداش من مرة في ليل تنبش في القبور الحديثة وقداش من مرة يلقاو جثة خارجة من القبر و مطيشة البرى في العراء

دونك هذا يوضح غياب السلطانة حفظ الله نور وجهها من احداث مملكتنا السعيدة وعدم اهتمامها بما يصير في الكواليس

دايور هو كي تجي تشوف موش الملكة برك ضاربها الهاجس اما ما علينا خلي المغطي مستور لاتلحم مشطة وكف و كلها توليلك الجمال جما ل الروح

عادا نغلق قوس السلطانة على امل معاتش نرجعلو و نرجعو لقصر السلطان وين خلينا عمار ونصيب السلطان يوشوشو

عمار يخصر خصرة مبهمة ويواجب في تكليلك واضح

_عرش ال...سلطان...اش..معناها

نصيب السلطان _ركز ياعمار يهديك ....السلطان كبر وامور المملكة معاتش تعجب ....والناس فدت وباش تتطرشق و الامور متبشرش بخير

عادا قلنا انو نقوم بواجبنا الوطني ونتصرفو من وازع اخلاقي و ننقذو المملكة عمار وفي صوتو شوية خوف

_تعرف الي لحكاية هاذي تنجم توصلنا للمشنقة

نصيب السلطان_ متخافش عمار والي يخاف ميلعبهاش ...انا محضر كل شي جيست شوية تعاون من عندك

عمار والاهتمام على وجهو _وضحلي

نصيب السلطان_عمار احنا تو في موقف قوة ...ثلث البلاد بقبق في البحر وثبث لاخر تحت يدك ثلث القزوردي و المخبرين اضافة انو قايد الحرس معندو وين يبوجي خاصة انو خيرت رجالو تحت امرتك و امرتي

عمار _اي ونسيت ثلث متع لحية

نصيب السلطان...لا يا صديقي هاكم الورقة الرابحة و هاذكم الي باش يجبولنا العرش

عمار و الاستغراب على كشختو

_كفاش

يتبع

lundi 28 décembre 2009

المملكة السعيدة الجزء الرابع

حكينا انو الناس في المملكة ولات معاتش تسئل علاش و تبدلت برشة حاجات في المملكة كيما انو اهل المملكة معاتش يقعدو في القهوة ولاو من بعد الخدمة كل جماعة تتلف في شيرة و حسب المخبرين متع ثلث القزوردي انو الثلث لول متع النجار و الحراقة كانو كي يكملو الخدمة في الورشة متاعهم ميروحوش و انما يهبطو الريدو متع الورشة و يقعدو فيها لساعات متقدمة من الصباح و ثلث صاحب اللحية كان كي يكملو نهارهم ينطلقو في مجموعات صغرى الى كوخ في اطراف المملكة و يقعدو ثمة يحكيو بصوت منخفض و يتناقشو في حكايات مهاش مفهومة و من بعد تسمعلهم دوي خفيف كدوي النحل قبل ما يغادرو المكان في شكل مجموعات صغرى

ورغم انو الاخبار هاذي كانت توصل للقصر الا انو السلطان مكانتش تقلقو على خاطر المفيد بالنسبة ليه انو الناس توقفت و معاتش تسئل علاش ؟؟؟؟

الا ان كان نهار هاكة

قامو الصباح اهل المملكة على صراخ مرى جاي من الساحل الشمالي للملكة

و في لحظة تلمت الناس الكل وين الصياح باش ياقفو على مشهد تقشعرلو الابدان

عشرات الجثث متع الشباب ملوحة على شط البحر و شوية لوح متع مركب كسرها الموج وملامح الشباب كلها كانو من اهل المملكة هاكي

وسط الدهشة يخلط السلطان الا انو كما يبدو المشهد ميهزوش فيطلب من عمار تفريق الحضبة على الطريقة العمارية و الي ميعرفش الطريقة العمارية

ينجم يتصل باقرب مركز في حومتهم ويقدملهم مطلب متع حضبة او مظاهرة و من غادي فرصة انو يعرف الطريقة

المهم انو الحضبة تفرقت وسط الدموع و الذهول و التمتيم و نظارات الاحتقار و الكره لسلطان

على خاطر اهل المملكة فهمو انو ثلث النجار مكانش يسكر الورشة باش يخدم وانما باش يصنع مركب يحرقو بيها للبر لاخر و الجنة الموعودة وعندما انتهت الاشغال لمو بعضهم و فصعو من غير ما يقولو لحد و من غير ما يودعو حد الا ان الطبيعة ابت ان يتحقق حلهم فكسرلهم الموج مركبهم و غرقها الناس الكل و قضى على ثلث كامل من سكان المملكة هاكي ..و بالتالي غرقت المملكة في حزن شديد و لبست السواد و دخلو اهل المملكة في صمت و حزن عميق ومعاتش عباد تكلم بعضها و الا تتضامن في بعضها و لا حتى تسئل على بعضها

بالرغم انو ثلث صاحب اللحية كان محافظ على اجتماعاتو و توقيتها و سير عملها و كان بين اللحظة و اللحظة يهبطو لشط وين يتلمو ويصليو الغايب على وخاينهم الي بلعهم البحر هذا كل و عمار يتبع و موش فاهم ويهز في الاخبار لقصر السلطان

في الاثناء هاذي كان نصيب السلطان يحيك في مؤامرة لاستلاء على العرش خاصة وانو الجو مشحون ضد السلطان و السياسة متاعو الي تسببت حسب اهل الحراقة في موت ولادهم في عرض البحر

وكان نهار و نصيب السلطان عيط لعمار الي لبى الدعوة كالحمامة رغم انو الوقت كان متاخر

عمار يدخل على نصيب السلطان الي كان قاعد في عرش السلطان وراكز قدامو صحفة غلة من اجود خيرات المملكة

عمار بشوية دهشة

_اهلاسيدي....لباس ماو جايبني من غطاية النوم ....وينو مولاي السلطان...وشبيك في بلاصتو

نصيب السلطان....مولاك السلطان يجبد فيه خميري .....وشيهمك فيا في بلاصتو و الا لا

المفيد ...شنية الاخبار ياعمار

عمار_والله شي مايعجب سيدي ...ثلث البلاد ماتو ....و الثلث لاخر نهار كامل في اجتماع في اطراف المدينة ....و الحالة الاقتصادية ماشية وتوخر و كثر السلب و النهب

نصيب السلطان_امممممممممممم.....يزينا عمار من الدموع و البكا....تو موش جماعتك ينهبو ويسرقو ...ومدورينها مرشي نوار متع شراب ومتسترين على بياعة الزطلة

عمار في مكر _هاكة سيدي قبل ماجماعتك يمسحولهم افاهم ويفكو الافار

نصيب السلطان يحب يقلب السيرة

_باهي عمار باهي ..انا عيطلك على حكاية اهم

عمار يصطنع الجدية

_نشا الله خير

نصيب السلطان يقوم من العرش ويقرب لعمار ويميل عليه في وذنو

_شقولك في العرش

عمار ينقز لتالي كينو صكو الضو و يخصر لنصيب السلطان خصرة كلها مبهمة