lundi 11 janvier 2010

تبربيش وحكايات فارغة

رغم اني نفضت يدي من الكورة و حلفت عليها بالعشرة من ترح بنزرت و النادي الافريقي تو عامين لتالي نهار تالي تبلبزت وقريب طيح الارواح موش من باب اني ضد العنف في الملاعب و الى تخميرات الفيراج على خاطر كي تجي تشوف الغنف المتبادل في الملاعب هو حاجة عادية و سلوك طبيعي من ناس ضاربها الكبت و مخنوقة و مذبيها تفرغوا في اول فرصة تصادفها

و الكبت ا طبيعي باش يتحول للعنف

اضافة انو من الباهي كي المواطن يعنف خوه المواطن مهما كان باش تجيه خفيفة طريحة وتبرد و الا تشليطة و تدويها الغرزو كيما يقول عم الهادي لعور بياع المرشي نوار و المرجيعية متاعي في محاولة فهم البلاد الي داخلة في حيط ولد المرى غالب و الا مغلوب

ديما تقعد الاضرار خفيفة و محصور بالنظر انز يتجلطم على قوى البوب و البوليس الي في الغالب لوغة الحوار متاعو مبنية عالمتراك و الاهات يعني هو يضرب و انتي معليك كان تتوجع

الحوار هذا غير صحي و موش منصوح بيه و لاقال بيه تيتوف لا طبة الاستعجالي في شرنيكول حتى جماعة القصاب ممكن يوافقوني

عادا قلت انو اضرابي عالكورة موش مردو رفض العنف في الملاعب و انما منشوفش علاش و قت بفلوسك تتسب امك و يتفك تليفونك وتاكل شحطة متراكية كي الضربة اللولبية متع الكابتن ماجد تقعد بعدها جمعة تنوس كالفار و حتى حشاكم باش تمشي لتولات تلوج على شكون يقعدك بالرغم انو يكون خاطيك و لاعندك لاناقة و لاجمل خاطر البوليس متاعنا كي يشوف حضبة خواطرو دور و مخو يعطي امر تلقائي بتفريق الحضبة ليدو الي شادة المتراك و يبدى يفلح فيها بلي عامل بلي خاطيه و من بعد يحاول يفهم علاش خاطر التفريق اولويتو

المهم حبيت باش نحكي شوية على هامش الكوب دا افريك الي صاير في انغولا و نعرج على بعض نقاط و لوح سطل مع الجموع

اولا باش نحكي على منتخب التوغو الي تعرض لسيل من الرصاص من جماعة متمردين مهمش عارفين علاش المهم لقاو في ايدهم سلاح و كرتوش و لزمهم يستعملوه

تو يا عباد ربي بلاد فيها اظطربات سياسية يتنقلولها بالكار و الا لواج ماو كي راد عليكم ربي اكريو طيارة متع البوسطة و اقصدو ربي باش جات في ا كراس الشوفار المسكين

متعدين في بلاصة بكار مزينة وتصفقو فرحانين ماو المتمردين مهمش باش يفهمو العملية اضافة انو الخلا هاكة سنين الله متعداتش فيه حكاية اضافة انو حاجة تمشي على اربعة تشيخهم في مخاخهم

تيه وما التماسح و الصيودا و الافاعي مسلمتش من كرتوشهم و ياعات كي يضربهم القلق يدورو على بعضهم يبقطو خلي كار مزينة ابوقلب و فيها فروخ ضاوية تمغض في شكلي

المهم على كل هانا دبرنا ثلاثة نقاط على قرعة الدغف و نشا الله جماعة التمرد يكملو مزيتهم و يتريو عالكمرون وعلاش لا يوسعو عملياتهم و يتريو عالايكبات الكل و هكاكة ممكن نهزو الكوب دفريك موش اكيد اما ثمة فرضية كبيرة نربحوه كي نقعدو وحدنا

حبيت زادة باش نحكي على ترح متع البارح الي اقل ما يقال عنو عالمي بلوغة الكورة

منتخب انغولا الي اثبت انو كيما منتخب التونسي يلعب 70دقيقة و من بعد يوفض امرو الي خلقو كان متقدم باربعة اهداف على نظيرو المالي لمدة 70دقيقة اربعة بنتوات يا بوقلب شخلى مرت المعلم متع انقولا تشطح في السمبا الاانو فلافيو الي تقولش حاطط برتكان في راشو را غير ذلك و انو شعار عاش رجلة مات رجلة و نلعب الكل في الكل قرر انو رفقة زملاؤو يخليو اسماؤهم لتاريخ و في بعض الدقائق متع واحد مشى يشري في باكو دخان ورجع يلقى النتيجة تعادل اربع بونتو يا عشيري في عشرة دقايق خلات العالم ياقف اكبارا لعزم الملاوين واثبت القولة انو المستحيل مهوش افريكان

نتصور انو في دقيقة 70 حطولهم شكارة خبز ورا غول التوغو و الي يقمرها ياخوها على هذاكة طرحا كلات الحشيش و قامت بغارة خشينة في العاصمة الانغولية تقولش قصف يا بوقلب

زادة مدمنا في الافريك حبيت باش نحكي عالمنتخب الجزايري الي اثبت زادة انو الهزيمة عنوانها عربي و من هنا نقترح عالنا س الي لاهية تسمي في الحجات انو يبدلوا سم هزيمة ب عربي على خاطر وزو يعطيو نفس المعنى وين تقول هزيمة باش طول يتبادر لذهنك كلمة عربي

على كل منتخب الجزاير الي حاليا ماكل زوز تقولش منتخب متع شياب شكبة مهوش هو المنتخب الي ريناه مع مصر و منعرفش علاش العرب كي تظلي ضد بعضها في حكاية تظلي تتفرج في ابداع و شي يوقف المخ تي الترح في السودان تقولش البرازيل تكور موش جزاير ومصر تقولش الانفلتار و اخترت الانقلتار لعشقي للمنتخب منتخب الشياطين الحمر و لاعبيه على غرار الشرير روني و المجاهد جيرار

وباش منطولوش قلت نتعدى لمنتخبنا الي اتحفنا بمبارة ودية كركوزية من النوع الثقيل مع منتخب قمبيا

المنتخب التونسي الي قالوا عائد من بعيد بطاقم تدريب وطني ومحلاها كلمة وطنية كالعادة رفهنا بمشطنا و صدق المشككين

فوزي البنزرتي رجل المرحلة الي منتصورش باش يضيف حاجة بخلاف شطحاتو التيكونيكية على حافة الملعب و روميكس التربريب و سبان الام

على خاطر المدة الي باش يحضر فيها عناصرنا الوطنية و يحفظهم النشيد بلا ش بلاي باك قصيرة

دونك معليهش لوم ونتذكروه كاس العالم 2014كان متشلناش

اضافة انو عنا عناصر غير عادية لدرجة انك كي تبددى تتفرج فيهم تتصور انك قاعد تتفرج في ترح في بطحة متع حي خامس متعاود بالصورة البطيئة

و كي تبدى تتفرج زادة تحبلك نص ساعة باش تفهم جوراتنا وين تمركي

تو بجاه ربي اك النفزي قول يجي ؟؟ياذنوبي هاكة وين تبنبي الكورة يخليها ويقطع ممكن يصلح فرانقي في حمام اما قول ياذنوبي كي وجودوا كي بلاش

و الا اك التحفة عصام جمعة انا شاكك فيه يبيع في الدخان المضروب متع جماعة الكونترا في تيران مهوش لاهي يلعب و الاقاعد يتعلم في لوغات و تقشقيش الحناك خاطر وين تجيه الكورة يبدى لاهي يا يحكي مع المدافعين متع الايكيب لخرى و الا يتفازض مع قولهم باش يقنعوا يبدل دخانو ويولي يشري من عندو اون قرو

الشرميطي ابن الخضراء هاكة حدث اولا حرج و قت سئلوه في المطار اشنية تحضيرات قاللهم جبت شوية ما زمزم هههه مفهمتش على شكون يتمنيكو

اضافة انو السيد يتذكر اسم في الترح اذا طارت مرتين مفهمتش اش يعمل بالضبط و ساعات ننسى عليه تقولش نلعبو بعشرة

اضافة بزيادة انو كي نبداو نكورو تقولش التيران مصلوب لجيهة ليمين يعني اليسار ميت و هذا موش غريب على منتخب بلادي اليسار متاعها كلو في قلبو

المهم ربي يسترنا و منعملوش الفضح باش ميجيناش عم خالد و يعطينا نقشات كفانا يا اخي

4 commentaires:

bent 3ayla a dit…

حتى العلامة المسجلة متع الراجل نطرتهالو؟

Clandestino a dit…

c'est ce qu'on appelle:
Titof wou Fidou cham3a

titof a dit…

لا ابتداءا من تو كل تدوينة باش تحمل اسم مدونة على حسب ترتيبي الشخصي للمدونات

البرباش a dit…

امالا انجم نقول مقوى سعدي... ههههه