dimanche 6 décembre 2009

عديت عام الجيش متاعك؟

وانا نحوص في المدونات عرضني السؤال التالي : عديت عام الجيش متاعك؟
للوهلة الاولى يبدو انو السؤال برىء و مفيه حتى نية واطية ولكن بمجرد انك تعرف خلفية طار السؤال هذا و الي ينتمي الى مليشة الواطي نية البلوغسفارية تحس انو ثمة نية مبية و انو ثم واحد يحب لعبها عمدة البلوغسفار و ممكن انك من خلال جوابك على هذاك سؤال و الي باش يكون بنفي طبعا يتم تتبعك من خلال الادراس ايبي متاعك و ترصيلك بعد عويم تجاوب بالايجا ب على سؤال واطي كيما هكة

بون رغم انو السؤال غير صحي الا انو يخليني نخمم انو علاش انا كشاب تونسي مطالب باداء الخدمة و الوطنية مقطع منها و نهار كامل لساني ممدود ميترو من جرة الفصعة من رافل و التربص بمنافذ الفصعة في كل قهوة نقعد فيها يعني منشرب قهوة كان في القهاوي الي نعرفهم و يكون فيهم اكثر من مخرج
اضافة الى اني ملي بلغ عمري السن القانوني متع الخدمة معرفتش روحي لبست صباط بخلاف المناسبات و كنت ديما نعتمد في الحذاء الرياضي من نوع بيما ننصح الاخوة الي عندهم مشاكل وطنية يستعملوه يعاون عالفصعة بالضبط

اضافة الى تنقيص من كمية استهلاك الدخان خلال دورات التجنيد و ممارسة رياضة الجري و العدو الريفي ا بو قلب واحد و لى يجري اكثر من باقا

و هنا نطرح السؤال علاش هالكم الهائل من الرعب ..لدرجة هاذي الواجب الوطني مفزع وخاصة انو احنا ناس نهاركامل نغردو بالوطنية و ناديوبيها و نثمنو

الحكاية و مافيها انو الواجب الوطني في هالبر مينجمش يكون اكثر من ترح مرمة و تمرميد و انتي في قلب اوسو هازز بالة و سخانة70و تحفر في مجاري الصرف الصحي قالك شنوة التنمية و مشاريع تنمية

و الا محشي تحت خشة و عندك كلشنكوف من عهد الثورة صناعية الصديد ضارب فيه و السقنطري يقلي فيك من اربعة شيرات قالك شنوة تدريب و الا حقيبة مليانة بالكرادي و انتي عاطي على ساقيك لريح و حالتك تشكي لسبحانو

المهم من المرمة متخرجش تعدي اك الثلاثة شهور تدريب على حمل السلاح و من بعد تتحول الى مرماجي غير عادي..عاد شلزني تو نخدم شهرين مرمة و نشري زوز فرودا في العيد و انا عديت عامي بأخف الاضرار

5 commentaires:

Anonyme a dit…
Ce commentaire a été supprimé par un administrateur du blog.
vega a dit…

Anonyme, barra 3aych weldi laouej chkounou bouk puis viens faire des commentaires sur le blogsphère (je ne sais pas demande à ta maman par exemple). ya walla frou5 kbabel!

Anonyme a dit…
Ce commentaire a été supprimé par un administrateur du blog.
titof a dit…

القافلة تسير و الكلاب تنبح

موش عمبالي عملتو فرية سنافر و لميتو رواحكم و عملتم موسم هجرة لباب بحر ؟؟؟

Anonyme a dit…

jolie reflexion !!!