vendredi 3 octobre 2008

المشجوب في مسلسل مكتوب

منعرفش لوقتاش باش تستمر سياسة الاستبلاه الي مؤسسة الاذاعة و التلفزة التونسية تمارس فيها علينا بحجة دعم الانتاج الوطني و اك الكلام الكبير متع الشعب و المناسبات السياسية

خلال طيلة شهر رمضان امتعتنا مؤسسة الاذاعة بزوز اعمال تلفزية و الي مزالو متواصلين لحد الان و العملين هاذم يتمثلو في زوز مسلسلات

العمل الاول يحمل عنوان مكتوب ومجا يعكس في الواقع كان العنوان متاعو الي يجسد واقع المواطن التونسي قدام التلفزة الوطنية و الي مكتوب عليه يعاني من افلاس الاعمال هاذي و يخلصها من مكتوب جيبو

العمل الثاني و الي قاعد يتعرض على القناة الثانية قناة الشياب يحمل عنوان صيد الريم و بالرغم من انو العمل هذا هارب برشة على العمل الثاني الى انو و حسب و جهة نظر العبد لله يعاني من بعض الاسقطات و الخلل و الي باش نحكي فيها نشالله في هالتدوينة

دونك باش نبداو مع العمل لول مكتوب الي صارت حولو ضجة كبيرة باعتبار انو مسلسل لامس المسكوت عنه و انا منكذبش عليكم وين نسمع انو ثمة عمل يعالج حكاية المسكوت عنه باش يتعرض فس قناتنا الوطنية الي و يتبادر الى ذهني طول صورة بوطبيلة ...و المرة هاذي ممشيتش لبعيد بالفعل كان شاف هالمهزلة هاذي طبال جديد سامي الفهري الملقب بفراشة و القادم من برنامج الصندوق للبيع الاحلام و الي يمثل اكتشاف رائع على صعيد سياسة الطبل التونسي

بو طبيلتنا مقراش الاخراج و عمرو مكان مخرج لمن بعيد و لمن قريب و لاعندو في سوق ميذوق الا انو للاسباب ميعرفها كان سبحانو و مسكوت عنها اختفى المخرج لول متع المسلسل بالرحومة و حل مكانو بو طبيلة بخفة الفراشة

و اقنع تلفزتنا العزيزة انها تغامر و تدرج العمل ضمن شبكتها الرمضانية و الحمد لله تم ادراج العمل هذا بعد الافطار للانو كان ادراجو في فترة الصيام راو ارتفعت نسبة المفطرين و نسبة مرضى الدم و السكر

ان عبارة معالجة المسكوت عنه في حد ذاتها اصبحت بحاجة اكيدة الى اعادة التعريف بعد ما صبح استغلالها لتسويق الاعمال امر متتداول و عادي

و منعرفش شنو المسكوت عنه الي عالجو المايسترو بوطبيلة و الملحن الطاهر الفازع و كمشة المهرجين الي برفقتهم و الي قعدو شهرين يرسكلو فيهم باش صنعو منهم ممثلين و امتعونا بالتحف الفنية مع العلم انو عنا برشة مؤهلات من داخل الميدان و حاملي اصحاب الشهائد العليا في الدراما و المسرح و الي يتم تجاهلم و الالتجاء الى هالتحف الكركوزية

بالنسبة ليا و انا نشوف في القضيا الي يعالج فيها هالمسلسل و الي يمثلو محاورو الرئيسية ملقيتش هلي يسميو فيه المسكوت عنه

فحكاية القضايا الي تتولد من خلال العلاقات الاجتماعية مهاش جديدة على الاعمال الوطنية فعديد الاعمال قدعالجت القضايا هاذي على غرار النساء العازبات و غيرو وكونو انو نعتبرو انو الحكييات هاذي جديدة هو قمة الجهل للاعمال الدرامية و انعدام للمواكبة

الي حاز في نفسي هو طريقة بوطبلية و الملحن متاعو في تصوير المرأة التونسية على انها امراة منحلة و و غريزية و جريئة الى حدود انها تفقد مميزاتها الانثوية و هيا تتحول الى دائرة الهجوم و معاكسة الراجل و هذا تعكس من خلال اغلب الشخصيات النسائيا في المسلسل و بالتالي يعلن بو طبيلة انو هذيكة المراة التونسية

المسلسل حكى على حكاية المخدرات هايل نقطة لصالحو وخاصة انو الحكاية هاذي بدات تضرب بشدة في تونس ة تستدعي وقفة حازمة من الافراد الكل و خاصة انا في بلاد متنتج كان البلف و تعتمد بصفة اساسية على مواردها البشرية

و تراهن بشدة على العنصر في مسار التنمية

لكن الي خلاني بلحق نضحك و انو المسلسل من خلال تقديمو لشخصية شكو خلى تاجر المخدرات انسان نبيل و خلى المتلقي يتعاطف مع الشخصية هاذي و لا و الاغرب من ذلك انو صور تجار الافة هاذي على انهم ضحايا لظروف اجتماعية وكينو يبحثلهم عن مخرج و تبرير الحاصل السيد قريب يمجدلنا الناس هاذم و على هذاكة ما ستغربتش كي لقيت فون على الفايس بوك اسمو شكو و كي عرضني غشير في الحومة سارق الفرينة من دارهم و يفرق فيها على فروخ الحومة و يعيطلو شكو

على كل نأكدلكم انو ماثمة حتى شي مسكوت عنه و القضايا الكل تناولتها الدرامة التونسية سواءا على خشبة المسرح او في قاعات السينما او حتى في التلفزة

على كل كان هذا حديثنا عن مكتوب و المرة الجاية عنا موعد مع صيد الريم

Aucun commentaire: