هنا الدوحة هنا القمة

وجاء اليوم الموعود و تلمت سادة العرب في بار الدوحة من اجل مناقشة القضايا المستعصية وبالطبيعة جابو معاهم طرف قربش و لا فتات باش يرفعوها في وجه التحديات
المشهد اقل ما يقال عنو كركوزي و اي محاولة متع نقد بناء و الا بياض هيا في حد ذاتها حكاية داخلة في حيط و معندها وين باش توصل للانو بالكاشف بان انو الناس هاذي متنجم تكون كان بوطبيلة متع رمضان التاش الوحيدة الي ينجم يعملها يصدعلك راسك بالحس ويزيد يكرزك قبل السحور

اولا باش نحكي عالفرقة الفلكلورية و الي جات بزعامة الاخ ملك ملوك افريقيا يا بوقلب كان هههه الجماعة الفاتحين قطعت عروقها باش تفتح افريقيا من عقبة للفاطمين لغيرو باش يجي ببوشة بومصة شعرو كالتل بوشوكة يقلك انا ملكها
نأكدلكم كان عقبة جا في بال بها البيعة المقطعة و انو شعر التل باش يحكم افريقيا راو عمل كي عاملت الرجال دردر فيها سطل بسيسة و قبللها لمبدوزة و كمل ايماتو غادي و نحى من راسو حكاية الفتح زايد تقولوش تكور مع المرسة جماعة تفتح و لخرى تسكر

عاد سي الاخ ضربها لينات شمسية حتى في سوق طبس يحشمو باش يبيعوها و حاطط الحطة تقولش بياع فيكس في نصبة غير مرخص لها في باب بحر و الا سمسار فاشل متع زرابي في سوق الكونترا متع الزاربي في بن قردان

سي ملك ملوك افريقيا و الفاتح متع درا شنوة و الي يعجبك في هالحكاية مسخ حوايجك و لي فحام الطرحة كلها فاتحة و كلها عاملة مزية و الله غرايب في هاليبيا حشى الي ميستهلش وبعد يقلك التوانسة ظالمينا

الحاصل السيد عمل قصة عربي تقولش عليه يحكي في برنامج رخيص على قناة 7من انتاج الطابية للهندي متع سامي الفهري و خطف الكلمة من غير حتى مينتظرها
و هذا موش غريب على حاكم عربي يعتبر النظام العدو الاول متاعو بعد الشعب الي قاعد في قفص الاتهام حتى تثبت برائته تحت شعار تهمة لكل مواطن و عربي مذنب حتى تثبت برائته

لكن ملك الدوحة و الاهو اميرها و الا دراشنوة اثبت انو 404لها عنوان واحد و لا احد فوق 404و الناس سواسية كأسنان المشط اما الحجب فال404عندما يضرب لا فرق لديه بين زعيم او مواطن كل كيف كيف

سي القذافي قلنا باش ينصرها و عالاقل يبهبر علينا شوية كبشار الاسد لكن من نقاشة صاحب السمو ظاهر بهيم و قدم قرعة و من بعد بدون اذن سيد قام و خرج

مفهمتش انا هالمهازل و العجز على ظبط النفس و خاصة انو الامر يتعلق بناس شادة مقاليد الحكم وين باش يهزنا اذا انتم عاجزين باش تكونو منظمين عالاقل علاش تحكمو في مصاير الناس و كيفاش تحبوهم يكونو منظمين
و كيما يقلك و اذا رايت رب البيت على الطبل ضاربا فلا تلمن الصبية على الرقص

الحاجة الثانية انو تم تسجيل غياب ابو تفليقة الي هاو غاطس في التحضير للانتخابات 2009عملا بالنصيحة عاند جارك لا يعيروك لكن منتصورش انو هذا السبب الي خلى ملك الجزاير يغيب و بالمناسبة هاذي نوجهلو التحية على اصرارو و عزيمتو في المحافظة على تقاليد الحكم الرءاسي المملكي العربي و نطمنو كيما طمنتو الا الانصار متخافش ميفكهالك حد

لكن انا رى انو غيابو وراه حاجة اخرى و خاصة انو الحكام العرب عندها الحاسة السادسة تلقاهش الحزين شم ريحة انقلاب و يقلك انا نخرج و هوما يتعقربو و نقعد عقاب عمري ملوح في دار مسنين في الدوحة و الا السعودية عاد شلز حمة يغني

على كل الله يصبرنا و لك الله ياغزة