ظاهرة التدخين الجزء 1

سمعت انو 2009هو عام مكافحة التدخين في تونس حسب ماحكاو جماعة الرديون نهارت ثلاثةهنا
مشكورين الاخوة انهم حكاو عالظاهرة هاذي
لكن بما انو انا من انصار الظاهرة هاذي ومن المنادين بمنح الاخ فليب موريس حفظه الله ورعاه جائزة نوبل لسلام و الادب و الفيزياء و الكل و تصنيفو ضمن العشرة الاوائل من عضماء الانسانية نظرا للابتكار العظيم الي طلعلنابيه و المتمثل في سيجارة المالبورو خاصة المالبورو احمر الي بتديك جوانح و تخليك مع كل صباح تبدى نهارك و فايضة عليك السعادة
هذا احساس مينجم يحسو كان المدخن و علا هذاكة نلقاو المدخنين يقدسو برشة الدخان و خاصة سيجارة الصباح او ما يعبر عنه في ثقافة التدخين "سقن الحياة"للانو السيجارة هاذي تخليك تفيق و تمنحك دوزة من السعادة تخليك قادر على تحدي العالم كلو و كان ضربتلك بعد سقن الحياة تنجم تمشي تحرر فلسطين و حدك انرجي كبيرة سقن بثلاثة نقاط فوق القاف
كانو الاخوة حكاو على القانةن الصادر في فيفري 98و القاضي بمنع التدخين في الاماكن العمومية و القانون هذا جا كنية مبية للقضاء على الاكثرية العرقية المدخنة للانو الدخان كيما قلتلكم تجاوز فعل اجبد و انفث الى ثقافة و ممارسة متحضرة و يخضع لطقوس على هذاكة الدخان نلقاو عندو اسماء متعددة و التفنن في اشتاق الاسماء لسقيارو مردها الحب و العشق المرتبط بين السيجارة و المدخن
دونك القانون الجائر هذا و الي منجحش و الي اصطدم بعزيمة التونسي و ارادتو القوية في المحافظة على ممرساتو و ثقافتو و روافدو و الارث الحضاري الي خلفهولو اجدادو عملا بموتو على ما مات عليه اباؤكم
و بالمناسبة هاذي نحب نحكي فازة صرتلي في مطار قرطاج من ورا الدخان
مرة في المطار شعلت سيقارو و قعدت شايخ معاه و قت جاني احد الاوربين كان قاعد موش بعيد عليا و طلب مني اني نطفي السيجارة بحكم انو مكان عمومي و بلاكة المنع قد راسي
بصراحة حسيتها ثقيلة كونو سيد براني و يحكم في سلوكي في بلادي اضافة انو السيد يحمل ملامح ايطالية و مع احترامي لشعب الايطالي ههههه
الحاصل طفيتو و كيما يقول نزار و غرقت في دخانه و اذا بيها تشد بعضها في اك البافل الرجاء التدخين في الاماكن المخصصة و هبطت الطامة و العامة و ستار ربي مسلكت كان بالسيف و الترحيم عالوالدين و تقولش شعفت بعدها خرجت و عاودت شعلت تحت شعار صامدون صامدون
الدخان صحيح اكبر قاتل و لكن ليس هناك اروع من قتل الحبيب ههه و مايموت حد ناقص عمر اضافة الى انو احنا ميتين من عند ربي
و الناس الكل نعرفو انو الكثافة في بلاد البنفسجة برشة خاصة العاصمة مع العلم انو الدخان كل عام ينقصلنا 16000جبري من البلاد
يعني عالاقل يوفرلنا 10000موطن شغل و 6000خبزة و صحن كفتاجي يا بوقلب اضفة انو يسكتلنا 16000نبار و الاهم انو يرتحنا من 3000منخرط في مليشية النادي الافريقي
الاحصائية هاذي تو بربي متساهمش في التنمية و دفع العجلة الاقتصادية
باش تقلي الدولة تخسر في الدوا
اش تخسر بربي في باكو فيرلغون و زوز حرابش راس و طشاشة فدة
ثانيا ياجماعة في بالكم انو الدخان داعم بالضبط و لاعب ارتكاز في اقتصادنا العزيز يعني اي محاولة لنيل منو هيا محاولة لنيل من اقتصادنا و مؤامرة على بلدنا العزيز تاقف وراها جهات مشبوهة
تي انا برك كان نبطل الدخان هذا اذا ممتش و الا ارتكبت جريمة الخبزة معاتش تخلطو عليها عاد لواه نضحي انا في سبيلكم و في عوض تمجدوني و تمجدو المدخنين و تاقفو في صفنا وفي وجه اعداء التدخين و الي صار واجب انو نسحبو منهم الجنسية التونسية للانو بان بالكاشف انو ميستحقوهاش لسعيهم الدائم لنيل من اقتصادنا العزيز
على هذاكة انا نادي انو 2009تكون سنة فيليب موريس
و2009تكون سنة المدخنين
و علاش لا نحيو تمثال ابن خلدون و نحطو في بلاصتو تمثال سيقارو علاه مدام العباد متعرفش ابن خلدون و تعرف السيقارو
يكون هذا الاخير احق
و على هذاكة انا ننصحكم ان كنتم تحبون بلدكم بحق انكم دخنو و دخنو لين تتخنقو فالفرد من اجل الكل
و مهما زتدم في ثمن الدخان فلسنا له بمبطلين و جعلناكم على ماقلنا من الشاهدين
و سيبوني خلي نمشي نعمل سيقارو