jeudi 2 juillet 2009

زعمة مايكل كان منخرط في تنظيم القاعدة

وقت مات مايكل و سقطت معاه اخر اسطورة كان السؤال الي تتوقعو من شارع كشارع تونسي هو زعمة مايكل مات و خاصة انو عنا شارع يتمتع بخيال خصب و متشبع بثقافة السيونس فكسيون
على غرار ماصار في العراق من سقوط بغداد الى اعدام الديكتاتور صدام حسين و اجتثاث فضلات مايسمى بنظام البعث وقتها طرحت فرضيات كان تنجم تمثل حقل خصب لمخرجي هوليود باش يشتقو منها مواضيع للافلام الخيال العلمي وعلاش الفرضيات هاذي تشكل ثورة في المجال هذا خاصة و انها فرضيات عالمية و اوريجنال برشة تلمون حجم البهامة الي فيها
من كونو صدام حي و هذاكة الي شنقوه وحيد يشبهلو وصدومة عادك بيه خرجلهم من تحت الارض هو وجيش و معدات و كتائب و طائرات و الي عملو هو مجرد فخ و مناورة
عبارة و انتي تسمع في فرضيات بهائمية كيما هكة كينك تتفرج في فيلم اقتله ثم يعود مع الفجر
على كل منخرجش عن الموضوع فقط الي حبيت نحكي فيه هو انو ما شدني في حوار بعض الناس زعمة مايكل مسلم و الا مات كافر
وقت يكون الحديث عن اسطورة مثل مايكل جاكسون بالطريقة هاذي بالحق شي ينطق الحجر على خاطر مايكل جاكسون و ان تولد في صمت فانو خارج من العالم بعد ما نقش اسمو في كل شبر من هذه الارض و خلى لمسة لا يمكن ان تمحى ابدا
دونك من خلال سيرتو الكل ماكبشت العرب كان في مسلم و الا لا
ناقص كان باش يطلعلنا بن لادن و الا ظواهري و يقلك راو السيد كان عامل معانا بطاقة انخراط و راو باش نثأرولو و يسميو كتيب باسمو كتائب الشهيد مايكل جاكسون و يزيدو يكرموه و يعملو غزوة يسميوها غزوة الشهيد جاكسون ماهم زعام

على كل الي حبيت نظيفو انو راهو الاسلام لاترفع قيمتو او تنقص بالاشخاص يعني كونو مايكل مات مسلم او لا هذا مهوش باش يزيد في الاسلام اوينقصو

وحكاية اخرى لاحظتها في الفايس بوك و هيا ايضا زلعة بهائمية وتتمثل في صورة شباب حزانا على مايكل و مشعلين الشمع على صورة
الاشكال موش هنا و الامور لحد هنا عادية مجموعة شباب تعبر عن حزنها لكن الزلعة في تعليق خشين برشة و مولاه بصراحة تلمون يفهملها بالضبط يستحق انو يدخل تحت حماية منظمة الامم المتحدة الى لاهية بالتراث و النوادر على خاطر الاشكال هاذي تخمم بت***والا خليني ساكت
عاد قلتلكم جا العظيم هذا الي يفهملها بالضبط و قالك الله يبارك ترابك يا تونس و هيبا عبارة شهيرة تفيد معنى التمقعير رغم اني مشفتش حتى شي يدعو الى السخرية لحد هنا الزلعة مزالت بهائمية متوسطة ولكن نشوفو كيفاش طورت ولات بهائمية عنيفة يا بو قلب بنقطين فقط فوق القاف
قالك وينهم هذام في غزة
شمدخل غزة في مايكل ؟؟؟؟وزعمة الشباب هذا كان عمل هكة وقت العدوان علبى غزة راي اسرائيل حشمت على روحها و قفت القصف
علاش غزة ولات حبل غسيل
وهاي تجارة بالقضية تقلو يمين يقلك غزة يا و الله احوال و اكهو

عاد قلنا مايكل رحمه الله سواء كان مسلم او لا لا يستحق انو ينعى بأكثر من لحكاية المقحولة هاذي متع مسلم و الا لا و الا مات مقتول و الا لا
الزح نظرية في المؤامرة في كل شي زعمة قتلتو اسرائيل خاطر اسلم
و الله صدق الي قال يا امة ضحكت من جهلها كل الامم

ملاحظة المدونة هاذي تحولت الى مدونة جماعية بعد التحاق احد الصديقات المدونات بها عل الاقل باش ميقعدش الحانوت فارغ ويمشي الانتاج

5 commentaires:

bent 3ayla a dit…

شاورتني قبل ما تزيد للا الشابة؟؟؟

MeTaLLisTiC a dit…

واللهي انا بيدي غلبو عليا العباد و كيفاش دخلو الامور في بعضها... لا خلاوه يعيش رايض و لا قعدو هوما رايضين كي مات...

الحاصل بالحق العالم خسر اخر اساطيرو... هاذيكة الدنيا...

Anonyme a dit…

والله انا الي ضحكني اكثر هو حساسيتك انت من الي بديث تدوينتك لين كملتها وانت تتحدث ومتقلق من انو الناس تتحدث عن انو مايكل هذا دخل الاسلام

حكيت وتشكيت ولكنك نسيت انك تقول لينا وين المشكلة انو واحد يتساءل انو هالمغني مسلم ولا

انا نفهم انو ثمة ناس عندها حساسية مرضية وقت الي يتذكر حاجة فيها اسم الاسلام
لكن هذيكة مرض ككل الامراض، لكن كيف تتحدث ماهو وضح للناس اش تحب تقول وبيننا وين المشكلة الي مقلقاتك

انا شخصيا مايهمينيش برشة السايب مايكل الي الناس عاملين عليه لمة وخلى عاد من هاك التاعبين الي يشعلو في الشموع

عملو بالراي جماعة الشرطة وقت الي قامو بتفريق هاك القننوات بعدما شعول الشموع متاعهم، تي حقهم هزوهم طول لمركز ايواء وتاهيل نفسي


مايكل هذا عدى عمرو الكل منحرف يفسد في الناس، وبالتالي حتى لو كان دخل في الاسلام لن يكون بمستوى موقف لطفل فلسطيني او عراقي او صومالي ينطلق مجاهدا

وقت الي نولو نعرفو نختارو الرموز الي نفتخرو بيها، تو تتبدل احوالنا

Anonyme a dit…

Le probleme c'est internet wel propagandes qui circule... boule de neige plus elle circule + elle grandie.

Anonyme moi aussi jsuis anonyme ba9louti lol

s7i7 klémék famma nes mridha bi kelmét "islem" w ena mouch menhom, laken zeda nfed men 3bed tji t9oli chbih triste 3la maykel tasma3lou fi ghneh, 3melt hekka li ghaza ? chdakel hetha fi hetha ?? wel videoette elli edour chey inata9 kol nhar ghonaya jdida soidisant ghaneha maykel. donc el mochkol mouch mochkolt islem, mais mochklet el "ta3asob el islami el baha'imi", bech me tefhmouhech bel ghalet = el ta3asob el baha'imi fel diin. genre salem -> non on dit salemou aleykoum.

...

Anonyme a dit…

بالطبيعه غزة ماهيش في حاجة لتعليقات من نوع "وينهم هاذومه في غزة" ، اما هي في امسّ الحاجة للتصويرة اللي في مدوّنتك انت ،و اللي مكتوب فيها "القدس في خطر" و اللي اسرائيل مرعوبه منها ، و كل ماحدّ يدخل مدونتك ، تدخل هي في حالة استنفار

ههههه

مخيبك يا صنعتي

:)

على فكرة ، كلمة "متوسّطه" و " متوسّط" ماهيش متاعك ، جيب من عندك