dimanche 1 février 2009

عبد الناصر بطل من ورق

برشة اصوات تصر باش تجعللنا من عبد الناصر جمال العسكري سفاح بطل لا وتمشي للابعد من ذلك و توهم رواحها انو عبدو مزال حي و انو رغم موتو مزال يشكل تهديد و يخوف ههه
الراجل ردوه فومبير يقوم من قبرو في ليل و يعمل تسكسفة و يخوف المعارضين ماعو و يرجع لقبرو هههه
في الوقت الي نساو فيه انو عمو عبدو متع الكباب و الكفة و ضربان الطبل و الحنك مات مرتين مرة في 67عندما لوث تاريخنا العربي بهزيمة كنا في غنى عنها ومرة سنة70 وقت بلع زروسو

سياسة سي عبدو الي جايبهالنا على اساس انوالمهدي المنتظر ولا عيسى المخلص و اك الشكارة شعارات الي عمرها مقتلة ذبانة ساهم بشكل كبير في تدخيل مصر في حيط و العالم العربي معاها و التشوهات الي تعاني فيها مصر اليوم مردها عصر الظلام الناصري و ايدولوجيتو العميلة لسوفيات
نجيو ناخذو انعكسات الناصرية على الواقع السياسي في مصر في اك الوقت هاكة
رغم انو الواقع السياسي في مصر في عهد عم عبدو كان يشكو من الفساد و الاضطربات الا انو كان في بداياتو ومآلو بالطبيعة التطور و النضج
الا انو سي عبدو بنظرته الحكيمة و الراشدة حكم على التطور السياسي في مصر بالاعدام واحاله على التقاعد بخلق بديل
اسمو الاتحاد الاشتراكي هالكافيشنطة متع دعم الرقصات اي الاتحاد متنحجمش تكون بديل باي من الاحوال عن التعددية
يعني السيد اول مدخلها دخلها بلوغة القائد الواحد و الحزب الواحد و الهدف الواحد و هات من اك اللاوي
الله يرحمك يابورقيبة كي كنت تضحك من هل هوكش -برى هاي جاتك رحمة عشية احد-والضعف الي تعاني منو الحركة الحزبية ليوم في القاهرة مردو هالاستبداد الناصري
وكذلك فان السياسة الناصرية لم تنسى ان تمر على الاقتصاد المصري و ترفعو بمشطة وهو المروفوع من اصله يعني جا يطبها عماها
من خلال تدميريه لتجربة الرأسمالية الي كانت حديثة الولادة في الوقت هاكة تو بالله دولة تاعبة وامورها مرهدنة و العالم كان الله يجي فيها نظام اشتراكي تي هو لينين المعلم متع الاشتراكية قالك هالثورة المقحولة بثلاثة نقاط فوق القاف متجي كان بعد تجربة رأسمالية يعني كيما قال خطوتين الى الوراء بور بيان ديماري موش ساك بلوغة السكارجية تتصب على مجتمع نسب الفقر و الجهلوت فيه بأعداد مهولة
اضافة انوالسيد دار يأمم فيها فيها على بعضها قريب باش يأمم البشر وحط العسكر على اداراة التأميم يا بو قلب العسكر عوضو رجال الاعمال و حلت الصرامة و الاوامر مكان الليونة و التفكير و لم تصنع التجربة الناصرية لا صاروخ و لا حتى ابرة وصنعة كرهبة رمسيس الكرهبة المسخرة ههههه الي موبيلات بياع فريكاسي عالشط راقدة في فوريار عندها شهرين خير منها
و الطفرة المالية خلال الخماسية الاولى من عهد العاهر موش مردها السياسة الحكيمة و الا القاعدة الانتاجية الي تعتمد البحث العلمي و انما سياسة النهب الي تم اتباعها بقرارت التأميم
وكمل السيد جابها الارض للجميع و جاب مسطرة و بدى يقسم في الاراضي لين كل واحد خلالو حفرة و بالتالي الفلاحة و لات خدامة في اراضيها
ومن بديهيات الزراعة انو الانتاجية متتحقق كان في الملكيات الواسعة و الخاصة
سياسة عبد الناصر ساهمت في تردي الانتاج الفلاحي وتراجع المردودية و الكاليتي
واقوى مصيبة لعدو الليبرالية انو خفض في ايجار المساكن و حرم خلو الرجل علا هذاكة المستثمرين العقارين قطعو و خلاوهالو واسعة و لاو معاتش يأجرو و انما يبنيو لتمليك و الاسوام نار متع 40 سنا خدمة علا هذاكة عرف العهد الناصري ازمة سكن و ربما تصنف لدى بعض المراقيب بأنها الاعمق في تاريخ مصر
و على المستوى العسكري السيد يحط في القيادات العشوائية من منطلق الوفاء لثورة و هوكي تجي تشوف منطق الولاء لشخص عبد الناصر
علا هذاكة نلقاو عاكف زوج الرقاصة و اكبر مرتادد للحانات و الكفيشنطات على راس الجيش المصري و تحولت المراتب العسكرية الا مراتي مدنية بعد الي الجيش هو الامر الناطق و التف بهالة السلطة و النفوذ و هذا ضرب الجيش المصري في مقتل و بان ذلك بالكاشف في نكسة الناصرين و القومين عام67
وبالطبيعة القرارات هاذي الكل استت للازمة اجتماعية هزت كيان المجتمع المصري حيث اسس عم عبدو لفوضى طبقية ضربت الطبقة الوسطى المصرية في مقتل وبالطبيعة كما تحدث دور كايم فان تدمير طبقة معينة من المجتمع هو تدمير لجزء من ملامح مجتمع معين فما بالك انوالطبقة الي دمرت في مصر كان هي الطبقة المفكرة و المبدعة ففي المجتمع المصري و قتها لاصوت يعلو فوق صوت طبول الاشتراكية و لافكر مواز لغير عبد الناصر
و لعل حربه على الاسلامين و محاولته اجتثاث الاسلام من جذوره و استبداله باسلام ناصري من خلال استهداف الكزادر الفكرية و التنظرية اكبر دليل على الاستبداد الناصري
منحكيوش عالليبرالين اش صار فيهم
و على المستوى الخارجي اوجعت عنتريات عبد الناصر و التطرف القومي الذي لم يقترن بالفعل رؤوسنا بان العرب عرق سام ورمز للكرامة و العزة وهات من اك اللاوي وخوض حرب بمنطق الطبلة زادة في تعميق الجرح العربي
ومحاولة طمس سوريا و تحويلها الى ولاية ناصرية
وم يبقى لي ان اقول ما قاله القباني
لم يدخل اليهود من حدودنا
بل تسربو كالنمل من عيوبنا



4 commentaires:

abu arabi a dit…

تحليل ممتاز...رغم اللى عبد الناصر مايستاهلوش...وعلى كل صفحتو طويت وبابورو زفر من هاكا العام ومانتوقعشى ان اسمو مازالت عندو قيمة...فترة حالكة من تاريخ مصر وتعدات

bent 3ayla a dit…

يا سي تيتوف، راك متحامل برشا ع الراجل. لازمك تقرا كل شي في اطارو التاريخي. م الساهل توا انو الاعوار الكل تخرج. عبد الناصر كان محبوب، و شعبو كان في وقت ما موافقو يعني هذاكا توجه الشعب.
عبد الناصر ع الاقل ما سرقش، ما تكبرش علي شعبو. جا للحكم انسان بسيط و مات بسيط.
الباقي عاد هاذاكا التاريخ ما يرحمش

jenni a dit…

من خلال استهداف الكزادر الفكرية و التنظرية

صحيح هي غلطة مطبعية . اما فعلا هوما ماهمش كوادر . كزادر . قزادر . من قزدريّة.صنعوهم الانجليز باش يضعّفو بيهم الوطنيين لخرين ، الوفديين بالخصوص

باقي تدوينتك ، شويّة كوبي كولّي . على شويّة طبقية ، على شويّة بورقيبية ، على شويّة لينينية ، على شويّة تكرار ممجوج لبرنامج شاهد على العصر متاع احمد منصور . على شويّة تمقعير ديمودي ، على شويّة استنتاجات جاهزة

note
5/20
peut mieux faire

titof a dit…

شكرا ابو العربي
بنت عايلة
لاشىء يبرر مصادرة الفكر وقتل الانسان