lundi 5 janvier 2009

الطابور الخامس+العمالة=الط......ن الافتراضي

عندي مدة نتبع في حكاية غزة و منحبش ندخل و ذلك لعدة اسباب خاصة ومتهمني كان انا لكن امام ارتفاع نسبة الطحين الافتراضي متع بعض لوخيان و الي ينطق الحجر معاتش فيها
بون اهوكة محبيتش نستعمل مفردات التخوين والعمالة والطابور الخامس رغم اني ضد تسمية الاشياء بغير اسمائها و منشوف حتى تسمية تليق بلي يكتبو فيه بعض لوخيان كان التسميات السابقة
بحيث انو حقيقة من المؤسف انو العدوان الاسرائيلي على شعب اعزل يتبرر و يدافع عنه.
وكينو الناس الي في غزة مهاش بشر وانما حفنة متع فيران معدية وجب القضاء عليها و ابادتها
ملا يا معشر الصائدين في الماء العكر شدو عندكم
حماس حبيتو و الا كرهتو خيار وطني فلسطني و صلت لسلطة من خلال صناديق الاقتراع يعني في رفضكم لهذه الحركة هو رفض وعدم احترام لقرار شعب اعطى و لا يزال يعطي من دمائه في سبيل تحرير و طنه
دونك موش باش يجيو حفنة متع انبطاحين يعطيودروس لشعب كيما الشعب الفلسطيني و يناقشوه في خيارتو الاستراتجية
الشعب الفلسطني اختار نهج المقاومة و اعرب عن استعدادو للمضي الى اخر رمق في هذا الخيار
و اكبر دليل التفاف سكان القطاع على المقاومة للانو كان جاو الفلسطنين مفروضة عليهم حماس نأكدلكم راو تم تسوية الاشكالية بنفس الطريقة الي تم تصفية العراق و كلنا كنا شاهدين على سقوط العراق و النهاية المخزية هناك لنظام البعث الي كان مفروض على العراقين هذا اولا
ثانيا كونو فلسطين ارض محتلة. حقيقة نقعد مستغرب كي يجي واحد ينتقد المقاومة بتعلة انو الضحايا و المدنين و هات من اك اللاوي
ياخي بلكش في بالكم الحرية تهدى من عندعمي رضوان في برنامج شمس الاحد
والا المقاومة لزمها تكون كي حركة فتح الحالية- العبرة بالمشاركة -
لا يا ناس الحرية ثمنها غالي و باهض ومينجم يكون كان الدم
ثالثا والي و قفلي الطاسة متاعي ياخي من وقتاش المقاومة و لات تتصنف من خلال ايديولوجيتها والا معتقداتها والا نهجها
و علاش الكلام هذا منلقاوه كان عند الليبرالين الجدد الرافضين للمقاومة و الساعين لتشويها
نتذكر الامر هذا صار في فرنسا في الحرب العالمية الثانية و قت الجموع غادي بقيادة حكومة فيشي الي نصبها الاحتلال الالماني اتهمو المقاومة بقيادة ديقول بأنها حركة تخريبية و ستجلب الويلات على فرنسا والمدنين
و لكن المقاومة انتصرت و اثبتت غير ذلك
و بما انو ثمة البعض مهوش فاهم المقاومة ميسالشنكلف نفسي عناء اني نخسر من وقتي ونعطيه درس
هيا شد عندك المقاومة هي رد فعل طبيعي على فعل ظالم
وكلما اشتد الفعل اشتد رد الفعل
وكلنا نعرفو الي اسرائيل من قبل 48 وهيا تجبد في الفلسطينين يبعني زايد باش نحملو حماس المسؤولية
و تحميل حماس و الاسلام مايحدث في غزة هو ماتريده اسرائيل ومؤيدها

1 commentaire:

ghaza a dit…

bravo mon ami