يمنع على الوطنين و القفافة و دهانة الفايس بوك

بعد الفضيحة الي فجرتها الرسالة متع المجاهدة الكبيرة جميلة بوحيدر الى الشعب الجزايري بعد عجزها عن القيام بتسديد نفقات علاجها استنفرت كل القوى سواءا اشعبية او السياسية في الجزاير او خارجو كل طاقتها و اعلنت عن دعمها المطلق و لا مشروط للمجاهدة
في حركة التفاف نبيلة تعبر عن مكانة المجاهدين و المناضلين داخل هذا القطر الشقيق
ولكن لحكاية هاذي فجرت اشكالية مفادها مكانة المناضل داخل وطنه هل هي مكانة تهميش ام مكانة اعتراف و دعم
باش تخرج لحكاية من الجزاير و تتحول جميلة بو حيدر من جديد الى رمز اخر اما المرة هاذي موش رمز نضال و انما رمز لمعاناة المناضل في ظل التهميش الحكومي
من الناس الي تناولت القضية و اطنبت في الحديث عنها سواءا على صفحة الفايس بوك او المدونات خونا حميدة فقة المصاب بانفلونزا الطحين عفانا و عفاكم الله
ٍH1BJ1

السيد هذا كيما غيرو اختار ركوب الموجة و استغلال فضية عادلة كيما هي عادتو وموش غريب عليه و تسديد لكمات اقل ما يقال عنها قذرة للمختلفين معاه فاختار عنوان المقال متاعو بشكل استفزازي

يمنع على المرتزقة و متسولي السفارات كالكلاب السائبة

يحيلنا بصفة الية على عناوين المقالات المذرحة في الجرايد او الخيش نظرا الي متنجم يكون عندها حتى استعمال صحي اخر كان الاستعمال هذا
و لانو ركوب الموجة من صفة المرتزقة و استغلال القضايا الانسانية العادلة من صفة الجبناء مكانش غريب انو السيد هذا يطنب في الحديث مع ادراج كمية هايلة من الزرارق معروفة لشكون موجهة
و لانو الي دارو من البلار ميحرجش ديار الناس رينا من الواجب انو نفضحو شوية حكايات ثماش منلقاو عن دهان الفايش بوك اجابة و اضحة
مناش في الصورة هاذي باش نحكيو علاش النافورة متخدمش و قت ليوم نحكيو على جودة الحياة و تطور العمل البلدي و السهر و غيرو
مناش باش نحكيو عالقازون متع الجردة هاذي الي تقولش ولا جانغل و مرتع للافعى البوا و الاسود و الخنازير البشرية
يكفي انو نقول انو الساحة هاذي ساحة شهداء
اي نعم يا جماعة ساحة شهدائنا و الي تالي ثمة عرصة طالعة لسماء مكتوب عليها اسماء شهداءنا الابطال الي سقطو في معركة الجلاء ببنزرت
الصورة مهاش كاملة صورنا منها كان النافورة الي متمشيش و الوسخ الي فيها
و اضافة انو الجردة هاذي مرتع لطالبي اللذة الحرام في شتى انواعها من جنس لخمر لمركز استراتيجي لبائعات الهوى و الشواذ
تقريبا شهدائنا اقل مسيتحقو جردة نظيفة عل الاقل من الاوباش احتراما ليهم و لاعمالهم
هذا محكيتش على مقبرة الشهداء الي ولات قبورهم طاولة متع فاطارة رمضان برغم تواجد الحراسة

الصورة الثانية تمثل النصب التذكاري نتع شهداء احداث حمام الشط85و الي راح ضحيتها اكثر من ميات شهيد بين تونسي و فلسطني اليوم الضريح هذا و الي يمثل رمز لترنديف و تبادل القبل تحتو و السهرات الماجنة كيما تبين التعاليق اسفل الصورة


هذا كلو و محكيناش على المناضلين في اشخاصهم و الي عنا 1000جميلة بوحيدر زادة تم تهميشهم بسبب مواقفهم السياسية و انتماؤهم كيما برشة من مناضلي جامع الزيتونة الي تم هضم حقهم تحت حجة و لاؤهم لليوسفية و غيرهم و منيش باش نحكي في الموضوع هذا لزوز اسباب
السبب الاول منجمش ندرج اسماء و السبب الثاني عجزي عن ادراج اسماء ميخلينيش نقدم دليل على صحة كلامي دونك ساهل تفنيديو
على كل العزة لشهداء و العار لراكبي الامواج