المملكة السعيدة الجزء الثاني

منعرفش علاش البعض في الجزءلول متع المملكة السعيدة اصر انو يشبه المملكة الي هي من محض خيال تيتو ببلاد الفرح الدائم ربما لانو يحمل احقاد على المسيرة الناجحة متع بلاد الفرح الدائم وموش عاجبو انها مخصصة جل وقتها لرفع التحديات و السهر و الحرص على راحتو بفضل كفاءات مشهودلها في العناية الموصولة و المقاربة الشاملة

على هذاكة نعاود نصر انو المملكة السعيدة معندهاش علاقة ببلد الفرح الدائم و انو أي تشابه في الشخصيات و الاحداث هو من محض الصدفة و اكبر دليل على صحة كلامي انو بلاد الفرح الدائم جمهورية مبنيا على التصويت المباشر و الحكم فيها يكون عبر صناديق الاقتراع موش كيما المملكة السعيدة الي قايمة على نظام ملكي بالوراثة

اضافة انو المملكة الوحيدة الي تلقى فيها الحجات الغريبة و الموش المألوفة
كيما مثلا حانة مكتوب عليها مغلق لصبلاة وجربوع يمارس في الحب مع قطوسة و الا مواطن قاعد يتحاكم على خاطرو اعتداء بالعنف على مواطن اخر شدو في بيتو نومو عقاب الليل يبربش في ذهب مرتو
باش منقولش سراق على خاطر المملكة هاذي الوحيدة في العالم اليم فيهاش سراق على هذاكة ميزنيتها ديما مطيحش

دونك الخونة و العملاء و احباء رياضة الجمناستيك من تكربص و تمطط وتزلحف على اعتاب السفارات الاجنبية و
الي اغواهم الدولار و الا يباتو يكيدو لها الوطن الغالي نطلب منهم يطيرو على خاطر الي يسال بلد الفرح الدائم مغرفة موش هنا يعيطهالها ينجم يتصل بأقرب مركز و الا حتى الشعبة الي حذى دارهم يسلمهم المغرفة غادي و متأكد انو باش يلقى الترحاب و التعاون خاطر بلد الفرح دائم بلد مؤسسات و المدنية متاعو قريب طرشق الايشال انترناسيونال متع التسامح
غادي نضمنلو يلقى شكون يسمعو خاطر بلد الفرح الدائم مبنية على الحوار و النقاش الهادىء المعنوي
موش متخلفة كيما فرنسا و امريكا الي تحاور ماديا

على كل قبل ما نغلق القوس نحب نقللكم الي انا منسمحش بمثل هاذي الممارسات عندي مهما كان مصدرها خاطرني انسان و طني أي نعم و طني لين قريب الوطنية تخرج من خشمي
على هذاكة زادة نحب نوصي خونا عمار الي قاعد يهجي تو نظرا لمستاوه التعليمي الضحل درج مكتب الي انا معاكم يد وقالب ضد جماعة الجمناستيك و انو مملكتي السعيدة معندها حتي علاقة ببلد الفرح الدائم
ونشا الله سي عمار ادام الله حدة سن مقصك الغالي منقعوش في سوء تفاهم و نتضرر انا بنيران صديقة و تدخل الفتنة بيناتنا ادامك الله
و الحجب اعزكم الله اوله404واخره بو فردة عفانا وعفاكم الله




نغلقو القوس و نرجعو لخرافتنا
عاد قلنا انو الضجيج وصل لقصر السلطان ادامه الله فقام من غطاية نمو مفجوع و نادى عالحرس و الحجاب يستفسر منهم الامر
الجماعة الكل كانو مبهمين ومهمش فاهمين حتى شي على خاطر في المملكة هاذي مكانش الحس يترفع و مكانش يستمع

وطلب الملك يبعثو واحد من الحرس في زي مدني يسقسي و يجيبلهم الخبر اليقين
و كان الاختيار على واحد حرس ذميم ميجيبوهاش فيه على خاطر الملك خاف من جماعة القهوة كي يشوفو الحرس يبدلوالهدرة رغم انو اهل المملكة هاكي مكونوش يخافو من الحرس على خاطر الحرس مكانش يعنيهم و كانت احتكاكتهم معاه قليلة ميستحقوه كان باش يطلعو بطاقة التعريف


اما اش باش تعمل هذاكة حد مخ السلطان و هذاكة اشقالو
و بالفعل تم ارسال الحرس و هنا كانت اول مرة تعرف المملكة المخبرين وبدات تتالى الاحداث و المرات الاولى و بدات تعرف المملكة حاجات متعرفهاش وبعد ساعة رجع الحرس للقصر و دخل لسلطان حامل الخبر الييقين

الحرس لسانو ممدود ميترو ....يا سيدي السلطان اجريلي

السلطان..اش بيك انطق اش ثمة

الحرس ..الرعية يا مولاي ..خلات

السلطان...الله يخلي دار امك ..اش بيك انطق اش ثمة

الحرس....الرعية يا مولاي ...يحكيو في حكايات فيها برشة علاش

السلطان عينيه تحلت صحافي وتسائل في استنكار ..شنوة ..كفاش ..تي احكي لانضربلك راسك

الحرس...سمعتهم يحكيو ....علاش احنا ملي عرفنا الدنيا و عرفنا كان السلطان
...علاش معناش انتخابات...علاش معناش احزاب ...علاش ديما نقولو الله يبارك...
علاش ...منتصادموش مع الحرس وتلحم بالكرموجام
علا ش احنا طيبين و برشة علاشات اخرين ا سيدي السلطان


السلطان يقوم من العرش و مينساش باش يتلفتو ويخصرلو خصرة عميقة مايفهم معناها كان هو و يتلفت للقايد الحرس و يقولو

السلطان..لملي الطرحة الكل واعملي اجتماع مجلس وزاري عاجل درجين نحب الناس الكل هنا عندي في القصر و متنساش في ثنيتك تتعدى عالكابل متع الريزو و تقصو و هز معاك الجنان متع الجردة اهوكة عندو سزاي باهي و السزاي اعزك الله هو مقص يستعمل لزبيرة الشجر و هنا كان اول ظهور لعمار404و خروجو من سرداب حديقة السلطان الا النور



في الاثناء هاذي وقت الملك كان يحكي مع الحرس اهل القهوة كانو يتجادلو في بعضهم و كثرة العلاشات و مثماش جواب
و فجأة علا صوت ما بيناتهم متع راجل في الخمسينات كرشو كبيرة و جهو فيولي أي بنفسجي يطلب فيه منهم الهدوء و بالفعل ساد القهوة هدوء عجيب
تقدم السيد هذا و طلع فوق الطولة و بدى يحكي
شبيكم ياجماعة ؟؟كمشة مرتزقة دخلو فيكم غولة ؟؟خونة و متزلحفين على اعتاب السفارة الاجنبية؟؟؟ناس باعت ضمايرها
و الواضح انو( الصريح) من فول الراجل هذا الموجه( لكل الناس) من( اخبار) و من (ملاحظ) خلات البعض يهز راسو في موافقة على كلامو الشي الي شجعو باش يواصل


ان مملكتنا اليوم هيا مثال يحتذى به في تجربتها الفريدة بين نظيراتها سواءا اقليميا او عالميا ....و خلاتها من خلال المقاربة الشاملة (هنامواطن يتلفت لمواطن ويسئلو في بلاهة شمعناها المقاربة الشاملة .بون حتى انا متسؤلونيش خاطر انا بيدي موش فاهمها جيست حسيتها تتماشى مع الخطاب و ظفتها)
تتبوءمراكز متقدمة ...فيقو يا ناس ..اش تحبوا كثر ...ماكلين شاربين فاتوراتكم خالصة ...كل احد ملمومين في الستاد ؟؟
و السيد هذا كان يشكل اول ظهور للقفافة و لينا نحكيو على القفافة في المملكة


و هنا يفاطعو واحد من اهل القرية في اواسط الثلاثينات كان ديما يقعد في القهوة و ميتكلمش و عمرو متكلم و حتى واحد ما يعرف صوتو
كان يرتدي قميص و مسيب لحيتو و ميلبسش كيما اهل القرية كان يلبس قميص و ميصليش كيفهم
الاخبار كانت تقول انو موش من مملكتهم و انو هرب للملكتهم من بلاد اسمها افغانستان و جا يطلب في الخبزة عندهم
دفع صاحب اللحية السيد القزوردي و خذى بلاصتو وسط استغراب اهل القرية و بدى يقول
الحمد لله الذي اعزنا بالاسلام و جعلنا من عباده المخلصين و الحمد لله الذي كشف عنا عصابة الجهل و ارانا الحق حق
اخوتي بعد ان قامت الحجة على السلطان الحل الجهاد الجهاد و قاتلوهم حتى لاتكون فتنة و افتحو مملكتكم
اهل القرية الطيبين قعدو يغصرو لبعضهم على خاطر الخطاب هذا كان غريب عليهم وكمل كانو يعرفو انو مملكتهم مسلمين و يعبد وفي ربي و حبو يفهمو شنوة الفتح الي يحكي عليه السيد هذا
الا انو بعض اهالي القرية تعاطفو مع السيد هذا و كان غالبهم من الشباب و بدات باش تولي مشاداة باليدين بينهم وبين الفريق لاخر متع السيد البنفسجي
و هنا نقز بيناتهم نجار القرية هو وصناع البلاد و قاللهم الحل عندي ياجماعة
نصنعو فلوكة و الناس الكل نحرقو الحدود و نمشيو لبلاد الروم
و من هنا بدات حكاية الحرقة
ويبدو كذلك انو البعض وافق و اخرين رفضو و انقسموا هل القرية الى ثلاثة مجموعات
مجموعة بنفسجية ومجموعة صاحب اللحية و مجموعة الحراقة
في الاثناء هاذي يوصل الوزراء للقصر متع الملك و يدخلو للمجلس متع السلطان وين يلقاوه راكش مع انصابو يتباحث في الاوضاع


يتبع