مطلب اسقاط جنسية

الى السيد الي لاهي بالجنسيات و يحكم شكون تونسي و شكون لا

الموضوع
مطلب اسقاط جنسية


انا الي مصحح اللوطة و باصم بالعشرة وفي كامل قوايا العقلية و منيش خاضع لتأثير حتى مخدر سواء كان قي شكلو السائل او الرعواني نطلب منكم بكامل الهدوء انكم تنحيولي جنسيتي اي نعم و تخلويني عديم الجنسية و كيما قال الهادي لعور بياع الشراب مارشي نوار في حومتنا ان تكون عديم الجنسية خير من ان تكون ولد هالبر
اكيد ثمة اسباب خليتني نتنازل عن جنسيتي و عن حقوقي المدنية الي نسمع بيها سمعان
اولا اخويا تكرزت معاتش تساعدوني انتم ناس كرماء برشة و انا راسمالي قذر انتم تأثرون على انفسكم و لو كان بكم خصاصة في الوقت الي سبحانو بعثلكم اعصار علجية نسبة لاعصار كاترينا الي ضرب امريكا تفرقو في المساعدات هنا وهنا
اضافة انتم ناس صادقين برشة الاعلام متاعكم غير عادي مطيح للبيسي و الجزيرة في سرعة الخبر و المصداقية متاعكم اصلا تلمون عيفتونا نشرة الاخبار رديتوها شربة فريت سخن و اعطيه و كل ما نتفرج في اخباركم نحس انو ضربني تران متع حضارة و اني متأخر 1000سنا
مننساوش زادة جودة الحياة و انتم لوالا في الجودة في العالم العربي و المنطقة و هاذي جودة منعرفها كان ماركة متع كحول لشعول يا اخي انا انسان منيش متع جودة و الا محسنية هاو الباسبور متاعكم و بطاقة التعريف و بطاقة ناخب و الا نقللكم كيفاه خليولي كان البسبور بلكش ربي ينوب بحرقة
بالتالي ياجماعة افتخر اني نكون اول تونسي يطالب باسقاط الجنسية متاعو و تبديلها حتى وحيد قرن من لفريك وكان محبيتوش و خليتوني عديم جنسية اتو نمشي نبني خيمة في المياه الاقلمية نعيش مع الدوفانا و النزلي خيرلي من هالبيعات

ولكم كامل الشكر و الاحترام
و السلام