اعترافات صباحية

الناس الكل تتبدل ..عادي تلقاه ناصب بوعودو و احلامو واخلاقو في نصبة قدام مطار …ميهمش شكون يشري …..ميهمش

ارفع راسك فقد ولى عهد الاستعمار....... منعرفش وين قابلتها هالحكاية …ممكن عنوان مدونة في سوق المدونات…الي تصرخ و تصرخ و من بعد يجي عمار يهزها بمشطة و يخلي مولاها يعوم في الناشح

قوم يا عبد الصمد العدو عل الابواب برا و قفهم

مزالو بعاد يا امي خلي نرقد شوية و كي يجي خويا دافيد تو نهز الكرهبة ونمشي نحكي معاهم هيا طفي الضو خلي نكمل نرقد

يا لولاد جيبوها مثماش لعب درابو البلاد في اللعبة و الامال الكل معقودة عليكم حكاية فارغة تاك تاك كورة في الشبكة عل الاقل فرحو الزوالي و انتي من غادي سمعني حماة الحمى ...........و متنساش تتعدى للجامعة تتقللهم كان غدوة ميصبوش البريمات نسيبو الترح

تخلويض ..كلام فارغ ...............معندوش حب و وحلها ......كنتروه قللهم نسخايلو ديناري سامحوني...زعمة شكون اقوى اللص و الا الروا...و القصّة ذبان ولات تسكت قّصّة حب

سمحني خويا.......... العباد الكل تطلب في السماح .........سمحني نتعدى سمحني نتكلم...... سمنحي نقطع شعري و عروقي ........مدام الكلام بلاش خلي نتكلمو قبل ميعملولو تعريفة و معاتش احرار

احرار ايهههههههههههههههه كلمة كبيرة…. وقتها موش وقتها…… زعمة الحرية شنية ..زعمة كي تقول حاجة متعجبهمش متركحش فيك المشطة …ميقوللكش يا خوانجي .....و الا يا كافر..... و الا يا بهيم .....اسكتو منين تعرف منو انتي

كلنا نحبو نعرفو …ومناش عارفين كش نعرفو ..نحبو نعرفو الجن الازرق وين خبى اولادو ..نحب نعرفو احنا علاش هكة و الي يتعدى يحط فينا ساق ..نبحبو نعرفو علاش عكا تعاني …علاش العراق احتلوه ….علاش ..علاش.....الناس الحلوين الي نعرفوهم ميقعدوش …

و يمشيو …و يبعدو و الدنيا تجري

و العباد الكل تجري الي رابط خبزة ورا ظهرو ويجري قالك يزي ملي جرينا ورا الخبزة خلي هيا تجري و رانا .....و الي يجري هارب ..بربي خويا لحظة …..شارع الحرية يخرج……سمحني منيش من هنا اما الشوارع الي في بلادنا بلاد البرد الكل تخرج

على هذاكة مكش تجري هارب

هارب من غدوة

من كلام المرا المرزي

من فاتورات العطار الموش الخالصة من قصة قديمة

من روحك

هاو قالك يبني في مستقبلو وفى عليه الياجور و لاخر جا يصب في طموحو غلاو عليه الحديد قعد هكاكة ديكابوتابل عريان

كلنا عرايا موش هاذي المشكلة المشكلة انو منعرفوش نتغطاو نتغطاو بمتع غيرنا و المتغطي بمتع غيرو ديما عريان

حتى دوا الفار معاتش يقتل وحدة في الحومة شدوها متلبسة بقصيدة بعثهلها حبيب القلب خرجوها من القراية و حصروها شربت دوا الفار ….صتاعة تونسية …سلعة مرهدنة مغشوشة…تذوق الموت و متموش ..هزوزها دارهم لسبيطار و من بعد متحسنت و روحت قتلوها ..مفهمتش علاش…..و نتصور منيش باش نفهم …كيما مفهمتش علاش انت عملت هكة……….و علاش ………زعمة استبلاه وسوء تمركز وتراكم الاخطاء الدفاعية

المهم ثمة حاجة تبدلت

اليمين تبدل و اليسار زادة تأثر بالتغيرات المناخية متع اليمين