كلنا غزة

ويستمر الحصار
......................


فلترفعوا عن شعبنا الحصار

عار علينا عار ان ننسى ان في غزة حصار

نهاية علوش شجاع

السلام عليكم يا جماعة و عيدكم مبارك و كل عام و انتم حين بألف خير
جرات العادة تيتوفية في عيد الاضحى المبارك انو العلوش يتذبح مخر بعد نص النهار لكن العيد هذا الامر مختلف حيث تم الاتفاق انو العلوش باش يتذبح باكرا وكان لزم الساعات الاولى لصباح بحجة انونكملوالحوصة بكري رغم اني شاكك في هالحجة وحاسس الي ثمة نوايا مبية قصد تصفية العلوش في اسرع و قت ممكن
العيد في بنزرت يختلف عن العيد في باقي بقاع الجمهورية باعتبار انو في البلايص لوخرين يمثل العيد فرصة للالتقاء العايلات و الحضب لكن في بنزرت هنا الي عايشين بمنطلق احنا غربين فانوكل واحد يذبح وحدووكل يغني على ليلاه يعنى العيد ينتهي بللحظة اغتيال العلوش على كل مش هذا موضوعنا و سامحوني باش نرجع بيكم اسبوعين لتالي من نهارت الي شرينا العلوش والمهمة هاذي الي تم القاءها على كاهل تيتوف بما انو ممثل الاسرة في الخارج -وزير الخارجية و الي لاهي بالقضيات بشتى انواعها من البرة ورغم انوالوالدة ربي يبقيها اقسمت انو العلوش الي يختارو تيتوف ميلزمهاش نظرا للاختيارات الغير موافقة متاعو في المجال العلالشي
ولكنها في الاخر الامر تذعن و تقعد تنتظر و بمجرد تقرقيش العلوش اي سلخانو و تبين الخيط الابيض من الاسود فانها تقدم التهاني لتيتوف بطريقتها الخاصة
لكن عام السنا يبدو انوالامر مختلف حيث انو تيتوف وفق في الاختيار و نجح في مهمة متاعو
وهوكي تجي تشوف انا علاقتي بالعلوش مهاش علاقة عمودية كيما اي علاقة بين مستهلك و منتوج وانما علاقة ملتوية مليئة بنوايا المبية من كلا الطرفين و العلاقة هاذي علاقة تاريخية قديمة ضاربة في القدم
علوش عام السنا علوش غير عادي اوما يعبر عنه في المجال هذا بعلوش الثورة الزنصفورية اي علوش حامل لقيم ومبادىء ثورية وخاصة المبدىء التونسي العظيم الي نحبوه برشة في تونس واطلق ساقيه لريح
وكوني حكيت على نوايا مبية في التعجيل بتصفية العلوش فان ذلك مرده الزوز عمليات انتحارية الي حب العلوش يعملهم تقولش السيد مشري من عندابوعصام في الفلوجة الى جانب عملية الفرار و الي تم احباطها بفضل يقظة تيتوف وتفانيه في صيانة الاضحية و السهر عليها .....يا بوقلب حتى هو حق موبيلات كان نلقى ركبلو موتور ونركب عليه ....
و لانو عملية الفرار و رغم التخطيط المحكم ليها من حضور جيد لعناصر الفصعة التمويه والتيتم وادعاء الاذعان
متمش اعتباطية على غرار بريزون برايك ههههههههه وانما ثمة معطيات اخرى لازم تتحط في الحسبان
المهم علوش عام سنا عذبنا بأتم معنى الكلمة لكن الحمد لله تصفيته على الطريقة البعثية نسبة الى الاحزاب القومية العربية كي يذبحومعارضيهم عالفجاري
على كل اليوم على الساعة التاسعة صباحا و على ايقاع النشيد الوطني التونسي تم ذبح العلوش على يد احد افراد الاسرة و ذلك بعد رفض تيتوف انوهو يقوم بالعملية ايمانا منه بالتعددية و سياسة التداول و افساح المجال لغيرو و اكتفى بدور المراقب و الملاحظ بالرغم انونوياه الامبريالية التوسعية تهددت في عقر دارو ......بصراحة محبيتش نذبح لغاية في نفس يعقوب .........هه

المهم منيش باش نطول خلي نمشي نحوص مع الجماعة و تو في وقت اخر نرجع بمزيد من التفاصيل

جماعة تونزي بلوغ كي يضربهم القلق

المدون الاول
اف يا صحيبي ....اف ...انه مقينة و رب الكعبة .....عنا برشة متعاركناش خاصة بعد انسحاب الاسلامين من تونزي بلوغ
المدون الثاني
لا تخف يا زميلي فاني طحت لك بكعبة انونيم لم تعرف البلوغسفار مثلها
مدون جاي يكركر في شلاكتو
واو يا شباب فلنعمل حملة ...و لنهاجم الانونيم ....المهم ان نهاجم حاجة ونتلهاو في عركة
ضجيج ..حس وعويل ...اصوات تعلو من هنا و هناك
الله يكب سعد العار انا باش نبطل التدوين من جرت الاونيم
اخر .....الفحة طارت من جرة ناس متحشمش
.....اخر ينتش في اخر رغم انه يشاركه الفكر
نعملو حملة و نرجعو الناس الي بطلت ..يا الله يا لولاد و سطك وسطك
هدوءءءءءءءءءءءءءءءءءءءءءءءءءءءءءءءءءءءءءءءءءءءءءءءءءءءءءءءءءءءءءءءءءء نسبي
مدون
نعملو جمعية
مدون اخر
هات الشلاكة خلي نحيلو الفصيلة متاعو
ضجيج و كف و مشطة
و كالعادة جماعة تهدد باش تعلق الصباط
شكرا يا اصدقائي عالضحكة الي تعملوهالي كل صباح هههههههههه
قالو زبدة تونس ..الله يرحمك يا قاسم